اسلام آباد (پاکستان نیوز) رواں مالی سال2025-26 کے پہلے چار ماہ (جولائی تا اکتوبر) میں تجارتی خسارے میں38 فیصد اضافہ ریکارڈ کیا گیا ہے، گزشتہ سال کے مقابلے تجارتی خسارہ3 ارب 46کروڑ 70 لاکھ ڈالر بڑھ گیا ہے۔ وفاقی ادارہ شماریات کے مطابق جولائی تا اکتوبر تجارتی خسارے کا حجم12ارب58کروڑ ڈالر سے تجاوز کر گیا ہے۔ گزشتہ مالی سال اسی مدت میں تجارتی خسارہ9ارب11کروڑ ڈالر تھا۔ چار ماہ میں ملکی برآمدات میں چارفیصد سے زائد کمی آئی ہے۔ جولائی تا اکتوبر برآمدات کا حجم 10ارب 44کروڑ80لاکھ ڈالر رہا۔ اسی دوران غیر ملکی درآمدات15.13فیصد اضافے سے23ارب ڈالر سے تجاوز کر گئیں البتہ ستمبر کے مقابلے میں اکتوبر2025میں برآمدات میں14فیصد اضافہ ہوا۔ اکتوبر میں برآمدات2.49ارب ڈالر سے بڑھ کر2.84ارب ڈالر تک پہنچ گئیں۔ ماہانہ بنیاد پر تجارتی خسارے میں4.21 فیصد کمی ہوئی،حجم 3.20 ارب ڈالر رہا۔ ستمبر کے مقابلے اکتوبر میں درآمدات3.57 فیصد اضافے سے چھ ارب ڈالر سے تجاوز کر گئی ہیں اکتوبر 2024کے مقابلے میں گزشتہ ماہ برآمدات میں 4.46فیصد کمی واقع ہوئی ہے۔
