نیویارک (پاکستان نیوز)امریکی وزیر جنگ پیٹ ہیگسیتھ نے انکشاف کیا ہے کہ ایران کے ساتھ جاری جنگ پر امریکہ کے اب تک 37 ارب 50 کروڑ ڈالر سے زائد اخراجات آ چکے ہیں۔ سینیٹ کی اپروپری ایشنز کمیٹی کے اہم اجلاس سے خطاب کرتے ہوئے انہوں نے بتایا کہ یہ رقم مئی کے وسط میں مرتب کیے گئے 29 ارب ڈالر کے ابتدائی تخمینوں سے کہیں زیادہ ہے۔ اس موقع پر پینٹاگون کی جانب سے جنگی اخراجات کی فراہمی کے لیے 67 ارب ڈالر کے اضافی دفاعی فنڈز کی درخواست کا بھی بھرپور دفاع کیا گیا۔ پیٹ ہیگسیتھ اور جوائنٹ چیفس آف سٹاف کے چیئرمین جنرل ڈین کین نے کانگریس کے سامنے اپنا موقف پیش کرتے ہوئے کہا کہ ستمبر کے اختتام تک ایران جنگ سے جڑے تمام اخراجات کو پورا کرنے کے لیے یہ اضافی فنڈنگ انتہائی ضروری اور لازمی ہے۔ تاہم ڈیموکریٹ سینیٹر جین شاہین نے اس درخواست پر سخت اعتراضات اٹھائے۔ انہوں نے نشاندہی کی کہ انتظامیہ کے پاس پہلے سے 75 ارب ڈالر کی غیر استعمال شدہ رقم موجود ہے، لہٰذا عوام پر مزید بوجھ ڈالنے کے بجائے انہی فنڈز کو استعمال کیا جانا چاہیے۔ اس اعتراض کے جواب میں پیٹ ہیگسیتھ نے وضاحت کی کہ یہ رقم پہلے ہی صدر ڈونلڈ ٹرمپ کی دیگر اہم ترجیحات جیسے کہ گولڈن ڈوم فار امریکہ، ہائپرسونک ہتھیاروں کی ترقی اور جدید دفاعی منصوبوں کے لیے مختص کی جا چکی ہے۔ انہوں نے یہ بھی واضح کیا کہ نئی درخواست میں مشرقِ وسطیٰ میں امریکی فوجی اڈوں کی دوبارہ تعمیر کے اخراجات شامل نہیں ہیں۔ اس سماعت کے دوران قانون سازوں نے مشرقِ وسطیٰ میں جنگ جیتنے کی حتمی حکمتِ عملی کی عدم موجودگی پر ٹرمپ انتظامیہ کے خلاف شدید ناراضی کا اظہار کیا۔
