بغداد:
عراق کے دارالحکومت میں امریکی سفارت خانے پر 3 راکٹ داغے گئے ہیں جس کے نتیجے میں ایک شخص زخمی ہوگیا۔
عالمی خبر رساں ادارے کے مطابق عراقی دارالحکومت بغداد میں حکومت مخالف مظاہرے جاری ہیں، ہفتوں سے جاری سے مظاہرے پُر تشدد شکل اختیار کر گئے ہیں۔ اسی دوران امریکی سفارت خانے پر تین راکٹ داغے گئے جو سفارت خانے کے کیفے ٹیریا میں گرے۔ راکٹ حملوں میں ایک شخص کے زخمی ہونے کی اطلاع ہے۔
سفارت خانے پر راکٹ حملے کے وقت چند امریکی اہلکار بھی موجود تھے، زخمی ہونے والے شخص کی شناخت ظاہر نہیں کی گئی ہے۔ گزشتہ کئی ماہ سے جاری مظاہروں کے دوران اس علاقے پر متعدد راکٹ داغے گئے ہیں تاہم پہلی بار امریکی سفارت خانے کو براہ راست نشانہ بنایا گیا ہے۔
گزشتہ ماہ مشتعل مظاہرین نے امریکی سفارت خانے پر دھاوا بول دیا جس کے بعد امریکا نے میزائل حملے میں قدس فورس کے سربراہ قاسم سلیمانی کو ہلاک کردیا تھا، جواباً ایران نے بھی امریکی فوجی اڈوں کو نشانہ بنایا تھا اور تاحال دونوں کے درمیان تناؤ برقرار ہے۔
واضح رہے کہ عراق میں درجن سے زائد فوجی کیمپوں میں 5 ہزار 2 سو امریکی اہلکار تعینات ہیں۔ ایران متعدد بار ان اڈوں کو نشانہ بنانے کی دھمکی دے چکا ہے جب کہ جنرل قاسم سلیمانی کی ہلاکت کے بعد عراقی پارلیمنٹ نے بھی امریکی فوجیوں کو واپس جانے کا کہا تھا۔
