واشنگٹن (پاکستان نیوز) امریکی وزیر تجارت نے صدر ڈونلڈ ٹرمپ کی گولڈ کارڈ ویزا سکیم کامیاب ہونے اور 1 دن میں 1000 کارڈ فروخت کرنے کا دعوی کر دیا۔ صدر ڈونلڈ ٹرمپ کی جانب سے متعارف کردہ گولڈ کارڈ یا گولڈن ویزا سکیم غیر معمولی کامیابی حاصل کرتی نظر آ رہی ہے۔ امریکی وزیرِ تجارت ہاورڈ لٹنک نے دعوی کیا ہے کہ انہوں نے 1ہی دن میں 1000گولڈ کارڈز فروخت کیے، جس سے امریکی معیشت کو 5بلین ڈالرکا فائدہ ہوا۔ یہ سکیم فروری 2025 میں صدر ڈونلڈ ٹرمپ نے متعارف کرائی تھی، جو دنیا بھر کے دولت مند افراد کو 5 ملین ڈالرز (50 لاکھ ڈالر)کے عوض امریکا میں مستقل رہائش اور اختیاری شہریت کی پیشکش کرتی ہے۔ یہ سکیم روایتی EB-5 ویزے سے مختلف ہے، جس میں سرمایہ کاروں کو کم از کم 10 ملازمتیں پیدا کرنا اور 1 ملین ڈالرز کی سرمایہ کاری کرنا لازم تھا، گولڈ کارڈ میں ایسی کوئی شرط نہیں رکھی گئی، بلکہ صرف سرمایہ کاری کرنا کافی ہے۔ اس سکیم کے تحت 5 ملین ڈالرز کی سرمایہ کاری پر مستقل رہائش ملے گی، سرمایہ کار چاہے تو شہریت لے یا صرف رہائش پر اکتفا کرے، بیرونِ ملک کمائی پر ٹیکس نہیں لگے گا۔ وزیرِ تجارت ہاورڈ لٹنک نے کہا کہ اگر آپ امریکی شہری ہیں تو آپ کو عالمی سطح پر ٹیکس ادا کرنا ہوتا ہے، لیکن اگر آپ کے پاس گرین کارڈ یا اب گولڈ کارڈ ہے تو آپ صرف امریکا میں کمائی جانے والی آمدنی پر ٹیکس دیں گے، باقی دنیا میں جو کمائیں گے وہ نان ٹیکسیبل ہو گا۔
