کراچی:
سندھ انڈسٹریل ٹریڈنگ کے ملازمین نے کورونا ایمرجنسی فنڈ میں 21 لاکھ روپے سے زائد کا عطیہ کیا ہے۔
ایکسپریس نیوزکے مطابق صوبائی وزیربرائے صنعت وتجارت جام اکرام دھاریجوکی ہدایت پرسندھ انڈسٹریل ٹریڈنگ (سائیٹ) کے ملازمین کی جانب سے 21 لاکھ روپے سے زائد کا چیک عطیہ کیا گیا۔ صوبائی وزیرجام اکرام اللہ دھاریجو کی جانب سے ملازمین کے جذبے کا خیرمقدم کیا گیا۔
اس متعلق صوبائی وزیرنے کہا کہ اس مشکل گھڑی میں ہمیں مصیبت میں مبتلا لوگوں کی مدد اسی جذبے سے کرنی ہوگی، ہم ایک قوم ہوکرہی کورونا وائرس جیسی آفت کا مقابلہ کرسکتے ہیں، مخیر افراد اگے آکر حکومت سندھ کا ہاتھ بٹائیں، کورونا ایمرجنسی فنڈ میں عطیات جمع کروائیں جب کہ عوام کورونا وائرس سے نمٹنے کے لئے حکومت کی ہدایات پرعمل کریں۔
