نیویارک(پاکستان نیوز )پاکستان انٹر نیشنل ائیرلائینز (پی آئی اے ) کی خصوصی پرواز 13جون کو اسلام آباد سے امریکی شہر شکاگو آئے گی اور وہاں سے واپس اسلام آباد جائے گی۔ یہ خصوصی پرواز، ان پروازوں میں سے ایک پرواز ہے کہ جو امریکہ میں پھنسے ہوئے پاکستانیوں کو وطن واپس لے جانے کے لئے خصوصی طور پر چلائی جا رہی ہیں۔قابل ذکر امر یہ ہے کہ پی آئی اے کی گذشتہ پرواز31مئی کو اسلام آباد سے نیوجرسی کے نیوآرک ائیرپورٹ آئی اور یکم جون کو نیوآرک سے پاکستانی مسافروں کو لے کر اسلام آباد واپس گئی۔اس سے پہلے پی آئی اے کی پروازیں خالی امریکہ آتی تھیں اور یہاں سے مسافروں کو لے کر روانہ ہوتی تھیں۔یکم جون کی فلائٹ کے بعد اب شکاگو آنے والی پی آئی اے کی نان سٹاپ فلائٹ بھی اسلام آباد سے مسافروں کو لے کر 13جون کو روانہ ہو گی اور شکاگو پہنچنے کے بعد وہی فلائٹ وہاں سے مسافروں کو لے کر نان سٹاپ واپس پاکستان جائے گی۔ان خصوصی پروازوں پر پاکستان ایمبیسی اور پاکستانی قونصل خانوں کے ذریعے پاکستانیوں کی رجسٹریشن کی جا تی ہے اور پی آئی اے اور نادرا کے ویب پورٹل کے ذریعے ٹکٹ کی بُکنگ کی جاتی ہے اور پیمنٹ حاصل کی جاتی ہے۔
