روم:
روسی صدر ولا دی میر پوتن نے لیبیا میں قتل و غارت گری اور امن و امان کی مخدوش حالت کا ذمہ دار نیٹو کو قرار دے دیا۔
بین الاقوامی خبر رساں ادارے کے مطابق روسی صدر نے اطالوی وزیراعظم کونتے سے اہم ملاقات کے بعد مشترکہ پریس کانفرنس میں لیبیا کی صورت حال پر تشویش کا اظہار کرتے ہوئے کہا کہ لیبیا میں صورت حال بد سے بد تر ہوتی جارہی ہے اور اس خوں ریزی کا ذمہ دار کوئی اور نہیں بلکہ نیٹو ہے۔
روسی صدر نے یورپی یونین کی جانب سے 23 جون 2020ء تک عائد کی گئی پابندیوں کے حوالے سے کہا ہے کہ وہ یورپی یونین کے ساتھ تعلقات میں بہتری کی امید رکھتے ہیں، یورپی یونین نے کریمیا اور سواس توپول کے غیر قانونی الحاق پر روس پر پابندیاں عائد کردی تھی۔
اس موقع پر اٹلی کے وزیراعظم نے میڈیا کو بتایا کہ روسی صدر پوتن کے ساتھ ملاقات میں شام، وینزویلا اور یوکرین کے بحرانوں پر اولیت کی بنیاد پر بات چیت ہوئی، روسی صدر کی اٹلی آمد پر اُن کا شکر گزار ہوں۔
