نیویارک (پاکستان نیوز)قرضوں تلے دبے اور کورونا لاک ڈاﺅن سے متاثر ٹیکسی ڈرائیوروں نے آج (جمعرات) سٹی ہال سے واشنگٹن ڈی سی تک کاروان ریلی کا اعلان کر دیا ہے ،پنسلووینیا ، واشنگٹن ڈی سی ، ورجینیا اور میری لینڈ کے ٹیکسی ڈرائیور بھی احتجاجی ریلی میں شریک ہوں گے ، نیویارک ٹیکسی ورکر الائنس کے ایگزیکٹو ڈائریکٹر بھیروی دیسائی نے کہا کہ لاکھوں ٹیکسی ورکرز اس وقت فاقوں پر مجبور ہیں اور وہ اس سلسلے میں کانگریس کی جانب سے نوٹس لیے جانے پر مزید ایک روز کا انتظار نہیں کر سکتے ہیں ، ڈرائیوروں کی حالت زار اس وقت قابل رحم ہو چکی ہے ، اب مذاکرات کا وقت نہیں رہا بلکہ حکام کو عملی اقدامات کرنا ہوں گے ، واضح رہے کہ نیویارک ٹیکسی ورکرز الائنس کا قیام 1998 میں عمل میں آیا اور اس کے 24ہزار ممبران ہیں جوکہ پیلی ، کالی اور گرین ٹیکسی کاروں کی نمائندگی کررہے ہیں ۔
