ہیوسٹن (نمائندہ خصوصی)مئیر ہیوسٹن سلوسٹر ٹرنر کی میزبانی میں بے یو سٹی ایونٹ سینٹر ہیوسٹن میں ہر سال کی طرح اس سال بھی امریکہ کے سب سے بڑے ورچئیول افطار ڈنر کا انعقاد کیا گیا جس میں مسلم سسٹر سٹیز ایسوسی ایشن آغا خان کونسل اور اسلامک سوسائٹی آف گریٹر ہیوسٹن سمیت درجنوں تنظیموں کے اشتراک سے 3 ہزار افراد کو ڈرائیو تھرو کے ذریعے افطار باکسس فراہم کیے گئے۔افطار ڈنر میں رکن کانگریس ایل گرین،شیلا جیکسن لی اور پاکستان کے قونصل جنرل ابرار ہاشمی، ہیوسٹن پولیس کے سربراہ فینر ٹرائے,رکن سٹی کونسل شگر لینڈ نوشاد کرم علی،پلمر لیٹیسیا سمیت مغربی اور دیگر مسلمان ممالک کے سفارت کاروں نے بھی شرکت کی۔اراکین کانگریس ایل گرین اور شیلا جیکسن لی کی طرف سے افطار ڈنر کی انتظامی کمیٹی کو کانگریسی توصیفی سند بھی پیش کی گئی جو کہ سعید شیخ نے وصول کی۔افطار ڈنر کے موقع پر میڈیا سے گفتگو کرتے ہوئے مئیر ٹرنر نے آئندہ سال مزید بڑے پیمانے پر افطار ڈنر کے انعقاد کی خواہش کا بھی اظہار کیا اور افطار ڈنر کو ہیوسٹن کی منفرد شناخت قرار دیا۔ انہوں نے مزید کہا کہ افطار ڈنر بین المذاہب ہم آہنگی اور ہیوسٹن کی Diversity کی شاندار عکاسی کرتا ہے۔ اس موقع پر گفتگو کرتے ہوئے رکن کانگریس ایل گرین کا کہنا تھا کہ رمضان خصوصی عبادتوں اور دعاوں کا مقدس اسلامی مہینہ ہے ہم سب کو اقوام عالم میں اتحاد امن اور سلامتی کی دعائیں مانگنی چاہیے۔افطار ڈنر کے موقع پر گفتگو کرتے ہوئے خاتون رکن کانگریس شیلا جیکس لی کا کہنا تھا کہ مختلف عقائد کے لوگوں کو جمع کرنیوالے اس 20 سال سے جاری عظیم افطار کا حصہ ہونے پر فخر ہے جس میں ہر عقائد کے لوگ جمع ہوتے ہیں۔انہوں نے ہیوسٹن کی مسلمان کمیونٹی کی خدمات کو سراہتے ہوئے کہا کہ مسلمان کمیونٹی نے ہر مشکل گھڑی میں آگے بڑھ کر مدد کی ہے۔اس موقع پر افطار ڈنر کی ہر سال مالی سرپرستی کرنے والے ممتاز آئل ٹائکون جاوید نے اپنے ویڈیو پیغام میں ہر سال افطار ڈنر کی مکمل مالی معاونت کی یقین دہانی کرائی۔ہر سال کی طرح اس سالْ بھی افطار ڈنر کے انعقاد میں غیر معمولی مالی تعاون کرنے پر سعید شیخ نے ممتاز آئل ٹائیکون جاوید انور کو خراج تحسین پیش کیا اور تمام آرگنائزیشنز سمیت رضاکاروں کا شکریہ اداکیا۔تقریب سے پاکستان کے قونصل جنرل ابرار ہاشمی ہیوسٹن پولیس کے سربراہ فینر ٹرائے,صدر ISGH ایمن کبیری،آغا خان کونسل ہیوسٹن کے صدر مراد آجانی اور رکن سٹی کونسل شگر لینڈ نوشاد کرم علی اور مسلمان رکن سٹی کونسل پلمر لیٹیسیا سمیت دیگر کمیونٹی رہنماوں نے بھی اپنے خیالات کا اظہار کیا۔
٭٭٭
