اقوام متحدہ(پاکستان نیوز) اقوام متحدہ کے سیکرٹری جنرل انتونیو گوتریش نے خبردار کیا ہے کہ جنگ اور فنڈنگ کی کمی نے اقوام متحدہ کے اہم ترقیاتی اہداف کی پیشرفت میں خلل ڈالا ہے۔ اردو نیوز کے مطابق انہوں نے نیویارک میں بریفنگ کے دوران اہداف پر بات کرتے ہوئے کہا کہ امن قائم کرنے، ماحولیاتی تغیرات کا مقابلہ کرنے اور مالی مدد کو فروغ دینے میں ہماری ناکامی ترقی کو نقصان پہنچا رہی ہے ۔ انہوں نے کہا کہ 2015 میں اقوام متحدہ کے رکن ممالک نے پائیدار ترقی کے اہداف کو حاصل کرنے کا عہد کیا اور 2030 تک دنیا کو تبدیل کرنے کے 17اہداف جن میں انتہائی غربت، افلاس اور بھوک کا مکمل خاتمہ شامل ہے، کو حاصل کرنا تھا، تاہم دنیا کو اس میں ناکامی کا سامنا ہے۔انہوں نے کہا کہ ہمیں پائیدار ترقی کے اہداف کے لیے عملدرآمد کو تیز کرنا چاہیے، ہمارے پاس وقت ضائع کرنے کے لیے ایک لمحہ بھی نہیں ہے، صرف 17 فیصد اہداف میں ہی پیشرفت ہو رہی ہے۔انہوں نے کہا کہ جب ممالک بہت سے شعبوں میں ترقی میں پیچھے رہ گئے ہیں تاہم نئے ایچ آئی وی انفیکشنز میں کمی، انٹرنیٹ تک رسائی، اور قابل تجدید ذرائع کیبڑھتے ہوئے استعمال میں امید کی کرن دکھائی دے رہی ہے۔انہوں نے کہاکہ بہت سے لوگوں کے لیے بنیادی ضروریات سے انکار ناقابل قبول اور ناقابل معافی ہے۔انہوں نے مزید کہا کہ عالمی سطح پر بڑے تنازعات کو حل کرنے اور امن قائم کرنے کے اقدامات سمیت پائیدار اور ماحول دوست معاشرے اور معیشت کے لیے کوششوں کی ضرورت ہے۔
