واشنگٹن (پاکستان نیوز) وائٹ ہائوس نے صدر ڈونلڈ ٹرمپ کی منظوری کے بعد نیا بال روم تعمیر کرنے کیلئے مشرقی وِنگ کے ایک حصے کو منہدم کرنا شروع کر دیا ۔امریکی صدرڈونلڈ ٹرمپ نے سوشل میڈیا پلیٹ فارم ٹروتھ سوشل پر لکھا کہ مجھے یہ اعلان کرتے ہوئے خوشی ہو رہی ہے کہ وائٹ ہائوس کے احاطے میں نیا، بڑا اور خوبصورت وائٹ ہائوس بال روم تعمیر کیا جا رہا ہے،یہ منصوبہ نجی فنڈنگ سے مکمل کیا جائے گا۔ڈونلڈ ٹرمپ کے مطابق گزشتہ 150سال سے ہر امریکی صدر کا خواب تھا کہ وائٹ ہائوس میں ایک بال روم ہو جہاں سرکاری تقریبات اور ریاستی دوروں کے موقع پر شاندار استقبالیے منعقد کیے جا سکیں۔ انہوں نے کہا کہ مجھے فخر ہے کہ میں پہلا صدر ہوں جس نے اس دیرینہ خواب کو حقیقت میں بدلنے کا آغاز کیا۔ رپورٹس کے مطابق بال روم کی تعمیر پر 250 ملین امریکی ڈالر لاگت آئے گی جبکہ صدرڈونلڈ ٹرمپ کا کہنا ہے کہ یہ منصوبہ وائٹ ہائوس کی موجودہ عمارت میں کسی قسم کی مداخلت نہیں کرے گا۔ کیلیفورنیا کے گورنر گیون نیوزم نے سوشل میڈیا پلیٹ فارم ایکس پر بیان دیتے ہوئے کہا کہ صدرڈونلڈ ٹرمپ کی ترجیحات میں وائٹ ہائوس کو بلڈوز کرنا شامل ہے، بجائے اس کے کہ وہ حکومت کا شٹ ڈائون ختم کریں۔ وائٹ ہائوس کے ریکارڈ کے مطابق مشرقی وِنگ 1902 میں تعمیر کی گئی تھی اور اسے متعدد بار مرمت و توسیع کے مراحل سے گزارا گیا۔
