واشنگٹن (پاکستان نیوز)ٹرمپ کی جانب سے سوشل میڈیا پر اپنی ایک متنازع تصویر حذف کیے جانے کے ایک روز بعد ان کی انجیل مقدس کی تلاوت پر مبنی ویڈیو جاری کی جا رہی ہے جس نے امریکی مسیحی برادری کے ساتھ ان کے تعلقات کو ایک پیچیدہ موڑ پر کھڑا کر دیا ہے۔ واشنگٹن سے موصولہ اطلاعات کے مطابق صدر ٹرمپ نے گذشتہ ہفتے بیضوی دفتر میں اپنی میز پر بیٹھ کر بائبل کے ایک مخصوص حصے کی تلاوت ریکارڈ کروائی تھی جسے منگل کی شام میوزیم آف دی بائبل اور ایک مذہبی اسٹریمنگ سروس پر نشر کیا جائے گا۔ صدر ٹرمپ ان 500 اہم شخصیات میں شامل ہیں جو امریکہ کے 250 ویں یوم تاسیس کی مناسبت سے منعقدہ ہفتہ وار تقریب امریکہ بائبل پڑھتا ہے میں حصہ لے رہے ہیں۔ اس مہم کے شرکائ میں چیف آف اسٹاف سوزی وائلز اور وزیر خارجہ مارکو روبیو بھی شامل ہیں۔ ٹرمپ نے جس عبارت کا انتخاب کیا ہے وہ مسیحی حلقوں میں انتہائی اہمیت کی حامل سمجھی جاتی ہے جس میں عاجزی، دعا اور توبہ کے ذریعے سرزمین کی شادابی اور گناہوں کی معافی کا ذکر ہے۔ تقریب کی منتظم بنی پاؤنڈز کے مطابق انہوں نے خاص طور پر دعا کی تھی کہ صدر ٹرمپ اسی مخصوص حصے کی تلاوت کریں۔ یہ تلاوت ایک ایسے وقت میں سامنے آئی ہے جب صدر ٹرمپ کو اپنی ایک حالیہ مصنوعی ذہانت سے تیار کردہ تصویر پر شدید تنقید کا سامنا کرنا پڑا جس میں انہوں نے خود کو مسیح کے روپ میں دکھایا تھا۔ اگرچہ انہوں نے یہ پوسٹ بعد میں حذف کر دی اور اسے ہلال احمر سے متعلق غلط فہمی قرار دیا، تاہم اس اقدام نے ان کے کٹر حامیوں کو بھی ناراض کر دیا۔ مزید برآں پوپ لیو چہارم کے ساتھ ایران جنگ کے معاملے پر ان کی حالیہ لفظی جنگ اور معذرت کرنے سے انکار نے بھی مسیحی دنیا میں ہلچل مچا رکھی ہے۔
