نیو جرسی (پاکستان نیوز)نیو جرسی کے ڈیموکریٹک سینیٹر کوری بکر نے مشی گن میں خواتین کے ایک اجتماع سے خطاب کرتے ہوئے انتہائی ڈرامائی انداز اختیار کیا اور اپنے حامیوں کو جمہوریت کے پیادے بن کر میدان میں نکلنے کی تاکید کی۔ انہوں نے امریکہ کی موجودہ سیاسی صورتحال کو ایک ہولناک طوفان سے تشبیہ دیتے ہوئے کہا کہ ملک اس وقت تاریکی اور تند و تیز ہواؤں کی زد میں ہے جہاں عام شہری متاثر ہو رہے ہیں۔ سینیٹر کا کہنا تھا کہ اس کڑے وقت میں مدد اوپر سے نہیں آئے گی بلکہ جمہوریت کے سپاہیوں کو خود اٹھنا ہوگا تاکہ امریکہ کے ادھورے خوابوں کو شرمندہ تعبیر کیا جا سکے۔ کوری بکر نے اپنے خطاب کے دوران حاضرین سے پرجوش سوالات کیے کہ کیا وہ ووٹ کے حق، بزرگوں کی تکریم اور بچوں کے روشن مستقبل کے لیے متحد ہو کر کھڑے ہوں گے۔ انہوں نے ڈیموکریٹک پارٹی کے کارکنوں پر زور دیا کہ یہ وقت نئی اصلاحات لانے اور امریکی وقار کو بحال کرنے کا ہے۔ واضح رہے کہ سینیٹر بکر اپنی اشتعال انگیز اور غیر معمولی تقریروں کی وجہ سے پہلے بھی شہرت رکھتے ہیں۔ سال 2018 میں سپریم کورٹ کے جج کی نامزدگی کے وقت بھی انہوں نے خود کو ایک قدیم جنگجو سے تشبیہ دی تھی جس پر انہیں سیاسی حلقوں اور میڈیا کی جانب سے سخت تنقید اور مذاق کا سامنا کرنا پڑا تھا۔ ان کے حالیہ بیان کو بھی مخالفین کی جانب سے ایک ڈرامائی مہم جوئی قرار دیا جا رہا ہے جبکہ ان کے حامی اسے قومی یکجہتی کے لیے ایک ضروری پکار سمجھ رہے ہیں۔ سینیٹر نے نیوارک کے میئر کی حیثیت سے اپنے دور کے تجربات کا حوالہ دیتے ہوئے کہا کہ قوم کو اس وقت ایک نئے عزم کی ضرورت ہے۔
