پاکستانیوں کیلئے Covid-19 کے پیش نظر امدادی سرگرمیوں کا سلسلہ جاری
اپنے بھائیوں، بہنوں کیلئے اب تک ہزاروں افراد کو خوراک اور 30 ہزار ماسک تقسیم کئے گئے
ریاست میں مقیم مخیر اور صاحب حیثیت پاکستانی کمیونٹی سے تعاون کی اپیل، ڈاکٹر شہزاد لطیف
شکاگو(پاکستان نیوز) پاکستان تحریک نظام یو ایس اے (PTN) کرونا وائرس کی ہولناکیوں سے تحفظ کیلئے متاثرہ پاکستانیوں کی مدد کیلئے اہم فریضہ میں ہمہ جہت مصروف عمل ہے، پی ٹی این یو ایس نے اپنے محدود وسائل کے باوجود ہزاروں افراد / خاندانوں کیلئے اشیائے خورد (فوڈ) کے باکس کے علاوہ 30 ہزار فیس ماسک متاثرہ افراد تک پہنچائے ہیں۔ پی ٹی این کے صدر ڈاکٹر شہزاد لطیف نے پاکستان نیوز کے نمائندے سے گفتگو کرتے ہوئے واضح کیا کہ پی ٹی این یو ایس، خالصتاً غیر سیاسی، سماجی و فلاحی تنظیم ہے۔ آزمائش کی اس گھڑی میں ہم امریکہ میں کمیونٹی کی امداد کےساتھ پاکستان میں اپنے بھائیوں، بہنوں کو بھی ضروری اشیائے خوراک اور وباءسے بچاﺅ کیلئے تمام وسائل بروئے کار لا رہے ہیں۔ انہوں نے امریکہ میں مقیم کمیونٹی کے مخیر و صاحب ثروت افراد اور اداروں سے عطیات، صدقات و زکوٰة کے ذریعے بھرپور تعاون کی اپیل کی ہے۔ تفصیلات و تعاون کیلئے پاکستان نیوز میں PTN کے اشتہار سے استفادہ کیا جا سکتا ہے۔
