واشنگٹن (پاکستان نیوز)مشرق وسطیٰ میں بڑھتی ہوئی کشیدگی اور عالمی خاموشی کے درمیان پاکستان نے ایک متحرک کھلاڑی کے طور پر ابھر کر دنیا کو حیران کر دیا ہے۔ جہاں کئی عالمی طاقتیں اس سنگین صورتحال میں پیچھے ہٹ گئیں وہیں پاکستان نے میدان خالی چھوڑنے کے بجائے صف اول میں رہنے کا فیصلہ کیا۔ سپہ سالار جنرل عاصم منیر کی ریاض میں اہم ملاقاتیں، وزیر اعظم شہباز شریف اور اسحاق ڈار کی انتھک سفارتی کوششیں اس بات کا ثبوت ہیں کہ پاکستان اس بار محض تماشائی بننے کے بجائے ایک فعال پل کا کردار ادا کر رہا ہے۔ تہران کی جانب سے بدلے ہوئے لہجے اور صدر مسعود پزیشکیان کے اس بیان نے کہ ایران اپنے پڑوسی ممالک پر حملے معطل کر دے گا بشرطیکہ وہ اس کے خلاف کسی کارروائی میں شریک نہ ہوں، خطے میں تناؤ کو کم کرنے میں مدد دی ہے۔ یہ محض روایتی میل جول نہیں بلکہ ایک انتہائی پیچیدہ اور بحرانی سفارت کاری ہے جس کا مقصد وسیع پیمانے پر لگی آگ کو بجھانا ہے۔ پاکستان کی قیادت نے ثابت کیا ہے کہ وہ مشکل وقت میں توازن برقرار رکھتے ہوئے برادر اسلامی ممالک کے درمیان ہم آہنگی پیدا کرنے کی بھرپور صلاحیت رکھتی ہے۔ سیاسی و عسکری قیادت کی اس مشترکہ حکمت عملی نے عالمی سطح پر یہ پیغام دیا ہے کہ پاکستان خطے کے امن و استحکام کے لیے کسی بھی حد تک جا سکتا ہے۔ اسلام آباد نے اپنی جغرافیائی اہمیت اور اثر و رسوخ کو استعمال کرتے ہوئے تصادم کے خطرات کو ٹالنے کی کوشش کی ہے، جو اس بات کی عکاسی ہے کہ پاکستان اب خطے کے معاملات میں صرف ایک مبصر نہیں بلکہ ایک فیصلہ کن اثر رکھنے والا ملک بن کر سامنے آیا ہے۔
