نیویارک (پاکستان نیوز)بروکلین میں سماجی تنظیمبروکلین ایمرج کے زیر اہتمام سالانہ افطار عشائیے کا باوقار انعقاد کیا گیا جس میں مختلف مکاتب فکر کے رہنماؤں، مذہبی پیشواؤں اور منتخب عوامی نمائندوں نے بھرپور شرکت کی۔ تقریب کا باقاعدہ آغاز پیس اکیڈمی کے امام عدنان الدین نے قرآن کریم کی تلاوت سے کیا جس نے پورے ماحول کو روحانیت اور سکون سے منور کر دیا۔ اس موقع پربروکلین ایمرج کے بانی ذاکر نے حاضرین کا شکریہ ادا کرتے ہوئے تنظیم کی جانب سے معاشرے کی فلاح و بہبود کے لیے انجام دی جانے والی خدمات اور ان کے مثبت اثرات پر روشنی ڈالی۔ پروگرام کے دوران نیویارک شہر کے پبلک ایڈووکیٹ جمانے ولیمز نے خصوصی طور پر شرکت کی اور اپنے خیالات کا اظہار کرتے ہوئے مسلمان معاشرے کی ہمت اور استقامت کو سراہا۔ انہوں نے ماضی کے کٹھن حالات کا تذکرہ کرتے ہوئے کہا کہ نائن الیون کے بعد کے وہ ایام جب لوگ گھروں سے نکلنے میں خوف محسوس کرتے تھے اب ایک قصہ پارینہ بن چکے ہیں اور آج یہ دیکھ کر دلی مسرت ہوتی ہے کہ اسی معاشرے نے اپنی محنت اور اتحاد کے بل بوتے پر نیویارک شہر کے پہلے مسلمان میئر کے انتخاب میں کلیدی کردار ادا کیا۔ انہوں نے مزید کہا کہ یہ کہانی اس عزم و حوصلے کی عکاس ہے جو ایک برادری اس وقت دکھاتی ہے جب وہ پس منظر میں رہنے کے بجائے سامنے آکر اپنی شناخت کو فخر سے بیان کرنے کا فیصلہ کرتی ہے۔ تقریب میں موجود دیگر مقررین نے بھی رمضان المبارک کی اہمیت اور باہمی ہم آہنگی کی ضرورت پر زور دیا اور اس عزم کا اعادہ کیا کہ انسانیت کی خدمت اور معاشرتی ترقی کے لیے مل کر کام کرنے کا سلسلہ جاری رکھا جائے گا۔ یہ شام نہ صرف مذہبی فریضے کی ادائیگی کا ذریعہ بنی بلکہ اس نے مختلف پس منظر رکھنے والے افراد کے درمیان تعلقات کو مزید مضبوط کرنے اور ایک دوسرے کے احترام و تعاون کے جذبے کو فروغ دینے میں بھی اہم کردار ادا کیا۔
