نیویارک (پاکستان نیوز)ڈیموکریٹس کی جانب سے حکیم جیفریز ایوان نمائندگان کے اسپیکر نامزد، 3 جنوری کو حلف اٹھانے کے بعد امریکا کے پہلے سیاہ فام اسپیکر بن جائیں گے اور کانگریس میں کنٹرول کے ساتھ صدر ٹرمپ اور ری پبلکنز کو سخت چیلنجز کا سامنا ہوگا۔ امریکی سیاسی تاریخ میں ایک اہم پیش رفت کے تحت ڈیموکریٹک پارٹی نے حکیم جیفریز کو ایوان نمائندگان کے اسپیکر کے عہدے کے لیے باضابطہ طور پر نامزد کر دیا ہے۔ نیویارک سے تعلق رکھنے والے رہنما نے بند کمرے کی رائے شماری میں اکثریتی حمایت حاصل کی۔ 3 جنوری 2027 کو نئی کانگریس کے اجلاس کے دوران مکمل ایوان کی رائے شماری اور حلف اٹھانے کے بعد وہ امریکا کے پہلے سیاہ فام اسپیکر کا اعزاز حاصل کر لیں گے، جو صدارتی جانشینی کی ترتیب میں نائب صدر کے بعد دوسرا اہم منصب ہے۔ حالیہ وسط مدتی انتخابات میں ڈیموکریٹس نے نمایاں کامیابی حاصل کرتے ہوئے کانگریس پر اکثریتی کنٹرول سنبھال لیا ہے۔ اس تبدیلی کے بعد اگلے برس سے ری پبلکنز اور صدر ڈونلڈ ٹرمپ کو قانون سازی، بجٹ اور حکومتی نگرانی کے حوالے سے سخت چیلنجز کا سامنا کرنا پڑے گا۔ حکیم جیفریز نے اپنے ایجنڈے میں مہنگائی اور اخراجات میں کمی، حکومتی جوابدہی اور عوامی مفادات کے تحفظ کو ترجیح دینے کا عزم ظاہر کیا ہے۔ تاہم، انہیں اپنی ہی جماعت کے اندر تیز تر اصلاحات اور نئی نسل کے ارکان کی توقعات پر پورا اترنے جیسے داخلی چیلنجز بھی درپیش ہیں۔ دوسری جانب ڈیموکریٹک قیادت میں دیگر تاریخی پیش رفت بھی متوقع ہے، جس کے تحت کیتھرین کلارک ایوان کی پہلی خاتون اکثریتی رہنما اور پیٹ ایگیلار پہلے لاطینی اکثریتی وہپ بن سکتے ہیں۔ کانگریس میں اختیارات کے اس توازن سے آنے والے برس میں واشنگٹن کی سیاست میں کشیدگی اور جوابدہی کے نئے دور کا آغاز ہوگا۔









