پناہ گزینوںپر ٹرمپ پالیسی کیخلاف سپریم کورٹ کا اہم اعلان

0
30

نیویارک (پاکستان نیوز)امریکہ میں غیر قانونی طور پر سرحد عبور کرنے والے تارکین وطن کی پناہ کی درخواستوں پر پابندی کا معاملہ اب باقاعدہ طور پر امریکی سپریم کورٹ میں پہنچ چکا ہے جہاں عدالت نے اس پالیسی کی قانونی حیثیت کا جائزہ لینے کا فیصلہ کیا ہے۔ صدر ڈونلڈ ٹرمپ کی جانب سے نافذ کی جانے والی ان سخت پابندیوں کا مقصد امریکہ اور میکسیکو کی سرحد پر سیاسی پناہ کی درخواستوں تک رسائی کو محدود کرنا ہے۔ اس سے قبل ماتحت عدالت نے اپنے فیصلے میں یہ مؤقف اختیار کیا تھا کہ انتظامیہ تارکین وطن کو پناہ کی درخواست دینے سے روک کر اپنے اختیارات سے تجاوز کر رہی ہے۔ ٹرمپ نے اپنی صدارتی مدت کے آغاز پر ہی جنوبی سرحد پار کرنے والے افراد کے لیے پناہ کے حصول کو ناممکن بناتے ہوئے اس پالیسی کا باقاعدہ اعلان کیا تھا۔ اس پالیسی کے تحت غیر قانونی طریقے سے سرحد پار کرنے والے افراد کو سیاسی پناہ کی درخواست دائر کرنے کا قانونی حق حاصل نہیں رہتا جبکہ مخصوص زمینی راستوں سے آنے والوں پر بھی کڑی شرائط عائد کی جاتی ہیں۔ دوسری جانب انسانی حقوق اور تارکین وطن کے فلاحی امور کے لیے سرگرم تنظیموں نے اس پالیسی کو عدالت میں چیلنج کرتے ہوئے مؤقف اپنایا ہے کہ متاثرہ افراد کو ملک بدر کرنے سے پہلے ان کے حالات کی مکمل جانچ پڑتال کا موقع فراہم کیا جانا ضروری ہے۔ اس مقدمے کے تحت سپریم کورٹ آئندہ چند ماہ کے دوران فریقین کے دلائل سنے گی اور رواں سال کے وسط تک اس اہم معاملے پر حتمی فیصلہ متوقع ہے۔ عدالت عظمیٰ کا یہ فیصلہ نہ صرف ٹرمپ انتظامیہ کی امیگریشن پالیسی کی سمت متعین کرے گا بلکہ امریکہ میں سیاسی پناہ کے پورے نظام اور طریقہ کار پر بھی دور رس اثرات مرتب کرے گا۔

LEAVE A REPLY

Please enter your comment!
Please enter your name here