واشنگٹن (پاکستان نیوز) امریکی ریاست میری لینڈ سے تعلق رکھنے والے سینیٹر کرس وان ہولن نے اعلان کیا ہے کہ وہ سینیٹ میں ڈیموکریٹک اکثریت کے رہنما کے منصب کے لیے چک شومر کیخلاف انتخاب لڑیں گے۔ یہ سیاسی پیشرفت وسط مدتی انتخابات میں ڈیموکریٹس کی جانب سے 55 نشستیں حاصل کرنے اور شاندار کامیابی کے فوراً بعد سامنے آئی ہے۔ کرس وان ہولن نے واضح کیا ہے کہ وہ اب وائٹ ہاؤس کی دوڑ میں شامل نہیں ہوں گے بلکہ ان کی تمام تر توجہ سینیٹ میں پارٹی کی قیادت سنبھالنے اور ڈیموکریٹک ارکان کو نئی سمت دینے پر مرکوز ہوگی۔ دوسری جانب موجودہ ڈیموکریٹک رہنما چک شومر کا کہنا ہے کہ انہیں پارٹی کے ارکان کی وسیع حمایت حاصل ہے اور وہ اس تاریخی اکثریت کے ساتھ امریکی عوام کے لیے بہترین خدمات انجام دینے کا عزم رکھتے ہیں۔ سیاسی تجزیہ کاروں کے مطابق یہ دہائیوں میں پہلا موقع ہے کہ سینیٹ میں ڈیموکریٹک قیادت کے لیے کوئی سخت مقابلہ دیکھنے میں آ رہا ہے۔ جہاں کچھ سینیٹرز نے چک شومر کی پالیسیوں اور کارکردگی کی تعریف کرتے ہوئے ان کی حمایت کا اعلان کیا ہے، وہیں کچھ رہنما روایتی سیاست میں تبدیلی اور نئی قیادت کے خواہاں ہیں۔ اس مقابلے کے نتیجے کا فیصلہ سینیٹ میں ڈیموکریٹک ارکان کی اکثریت کی رائے سے ہوگا۔






