اسلام آباد:
کوآرڈینیٹر این ایل سی سی لیفٹننٹ جنرل معظم اعجاز کا کہنا ہے کہ ملک سے ٹڈی دل کا خاتمہ کردیا گیا ہے۔
اسلام آباد میں نیشنل لوکسٹ کنٹرول سینٹر (این ایل سی سی) کی تقریب سے خطاب کرتے ہوئے کوآرڈینیٹر لیفٹننٹ جنرل معظم اعجاز کا کہنا تھا کہ ٹڈی دل کے حوالے سے مئی میں صورتحال تشویشناک تھی تاہم ٹڈی دل اگست میں کم ہونا شروع ہوا اور اب ملک سے ٹڈی دل کا خاتمہ کردیا گیا ہے، یہ لوکسٹ واریرز کی انتھک محنت سے ممکن ہوا۔
اس خبر کو بھی پڑھیں : کراچی والے ٹڈی دل کی کڑاہی اور بریانی بناکر کھائیں، وزیر زراعت سندھ
جنرل معظم اعجاز نے کہا کہ وفاقی وزیر سید فخر امام کے عزم کی وجہ سے وفاق اور صوبے منظم کوشش کرتے رہے جب کہ ہم صوبوں کے بھی مشکور ہیں جنہوں نے ہر سطح پر انسداد ٹڈی دل پر کام کیا ۔ ان کا کہنا تھا کہ این ڈی ایم اے نے بھی این ایل سی سی کی بہت مدد کی، وزارت خارجہ نے سفارتی تعاون میں بہترین حکمت عملی اپنائی جب کہ ایف اے او کی مشاورت نے انسداد ٹڈی دل میں ہمار بہت ساتھ دیا۔
اس خبر کو بھی پڑھیں : حکومت نے ٹڈی دل سے نمٹنے کیلیے نیشنل ایمرجنسی ڈکلیئر کردی
تقریب سے خطاب کرتے ہوئے چیئرمین این ڈی ایم اے لیفٹینٹ جنرل محمد افضل کا کہنا تھا کہ ہم نے کورونا اور ٹڈی دل کے چیلنجز پر قابو پانے کیلئے کامیاب حکمت عملی اپنائی، ٹڈی دل کے چیلنج پر قابو پانا باعث مسرت ہے اور نیشنل ڈیزاسٹر مینجمنٹ اتھارٹی نے ٹڈی دل کے خاتمے کے لیے بھرپور حصہ ڈالا۔ انہوں نے کہا کہ کورونا کے حوالے سے خدشات موجود ہیں تاہم کورونا صورتحال میں کئی مثبت چیزیں بھی سامنے آئی ہیں۔
