کراچی:
بین الاقوامی شہرت یافتہ معروف گلوکار علی ظفر کو لاک ڈاؤن کے دوران لوگوں کی مالی مدد کرنے پر صدر مملکت کی جانب سے شانِ پاکستان کے ایوارڈ سے نوازا گیا ہے۔
گورنر ہاؤس لاہور میں منعقد ہونے والی ’’ شان پاکستان ‘‘ کے عنوان سے منعقدہ تقریب میں صدرِ مملکت عارف علوی، گورنر پنجاب چوہدری محمد سرور، اور وزیرِ اعلیٰ پنجاب عثمان بزدار نے شرکت کی۔ یہ ایوارڈ کورونا وباء میں شاندار خدمات پیش کرنے والوں کو دیا گیا۔ ۔ جب کہ اس موقع پر کووڈ 19 کے خلاف جنگ اور سماجی کاموں کے لیے علی ظفر فاؤنڈیشن کی خدمات کا اعتراف بھی کیا گیا۔
اس شاندار تقریب میں کورونا کی جنگ کے خلاف نبردآزما ہیروز کو اعزازات سے نوازا۔ ان میں صفِ اول میں موجود کورونا وائرس سے لڑنے والے ہیلتھ ورکر اور ڈاکٹر بھی شامل ہیں جنہوں نے اس جنگ میں اپنی جانوں کا نذرانہ پیش کیا۔
لاک ڈاؤن کے تناظرمیں خواجہ سراؤں، ضرورت مند موسیقاروں اور بالخصوص مسیحی برادری سمیت دیگر اقلیتوں کی مدد کرنے پر صدر مملکت کی جانب سے گلوکارہ علی ظفر کو شانِ پاکستان کے ایوارڈ سے نوازا گیا۔
