واشنگٹن (پاکستان نیوز)امریکی محکمہ انصاف نے ایک تاریخی اقدام کے تحت 1.776 ارب ڈالر کا ایک بڑا فنڈ قائم کرنے کا اعلان کیا ہے جس کا مقصد ان افراد یا اداروں کو مالی معاوضہ اور سرکاری معذرت خواہانہ خطوط فراہم کرنا ہے جو ماضی میں وفاقی حکومت کے اداروں کی جانب سے مبینہ طور پر سیاسی، نظریاتی یا ذاتی وجوہات کی بنا پر انتقامی کارروائیوں، ہراساں کیے جانے یا بے جا تحقیقات کا نشانہ بنے ہیں۔ یہ پیشرفت صدر ٹرمپ، ان کے بیٹوں ایرک ٹرمپ اور ڈونلڈ ٹرمپ جونیئر اور ٹرمپ آرگنائزیشن کی جانب سے امریکی محکمہ داخلہ اور ٹیکس وصولی کے ادارے کے خلاف دائر کردہ اس مقدمے کو واپس لینے کے معاہدے کے بعد سامنے آئی ہے جس میں انہوں نے ٹیکس ریکارڈز کی غیر قانونی تشہیر سے پہنچنے والے مالی اور ساکھ کے نقصان کا دعویٰ کیا تھا۔ اس نئے فنڈ کی نگرانی کے لیے اٹارنی جنرل ٹوڈ بلانچ پانچ ارکان پر مشتمل ایک خصوصی کمیشن مقرر کریں گے، جو کانگریس کی قیادت کی مشاورت سے کام کرے گا۔ یہ کمیشن درخواستوں کا جائزہ لے کر معاوضوں کی منظوری دے گا اور یہ پورا عمل 15 دسمبر 2028 تک جاری رہے گا۔ تاحال یہ واضح نہیں ہو سکا کہ 6 جنوری 2021 کے دارالحکومت کے ہنگاموں میں ملوث افراد، جنہیں حال ہی میں معافیاں ملی ہیں، اس فنڈ سے فائدہ اٹھانے کے اہل ہوں گے یا نہیں۔ محکمہ انصاف کے حکام کا کہنا ہے کہ اس اقدام کا مقصد مستقبل میں حکومتی طاقت کے سیاسی استعمال کا راستہ روکنا ہے جبکہ ناقدین کا ماننا ہے کہ یہ فیصلہ عدالتی نظام کی خود مختاری پر اثرانداز ہو سکتا ہے۔
