لاہور:
نسیم شاہ کی عمر کے بارے میں بحث چھڑ گئی۔
آسٹریلوی میڈیا میں سامنے آنے والی رپورٹس میں پیسر کی عمر پر طنز کیا گیا،ایک رپورٹ میں کہا گیاکہ 2016میں ویسٹ انڈین پیسر اینڈی رابرٹس نے کہا تھا کہ 16سالہ پیسر نسیم کی صلاحیتوں سے میں بڑا متاثر ہوا ہوں۔
دوسری رپورٹ میں ایک برطانوی صحافی کی ٹویٹ کا حوالہ دیتے ہوئے لکھاگیا کہ انھوں نے گذشتہ سال نسیم شاہ کی عمر 17سال بتائی تھی، اب یہ کم کس طرح ہوگئی۔ سابق بھارتی کرکٹر محمد کیف بھی پیچھے نہیں رہے، انھوں نے کہا کہ لگتا ہے کہ نسیم شاہ کی عمر بڑھنے کے بجائے کم ہورہی ہے۔
برسبین میں موجود پاکستان کرکٹ بورڈ کے چیف ایگزیکٹیو وسیم خان سے سوال کیا گیا تو انھوں نے کہا کہ سب بکواس ہے،نسیم شاہ کا چہرہ دیکھیں اس پر ابھی تک بال نہیں آئے،اس طرح کی باتیں سامنے آنے کی وجہ یہ ہے کہ کم عمری میں بھی پیسر پختہ ذہن اور انٹرنیشنل کرکٹ کھیل رہے ہیں،حقیقت یہ ہے کہ وہ 16سال کے ہیں، بھارت جو بھی سوچے اس کی ہمیں کوئی پرواہ نہیں۔
