نیویارک(پاکستان نیوز)پبلشر پاکستان نیو’ مجیب لودھی کی جانب سے سوشل میڈیا پر وائرل نابینا قلی کی ویڈیو ارباب اختیار تک پہنچانے کی کوشش رنگ لے آئی ، مسلم لیگ ن نیویارک کے صدر احمد جان کی توسط سے نابینا قلی کی ویڈیو امریکہ دورے پر آئے وزیر ریلوے حنیف عباسی تک پہنچی تو انھوں نے فوری نوٹس لیتے ہوئے نابینا قلی کے بیٹے کو ملازمت دینے کا اعلان کیا، وفاقی وزیر ریلوے قلی اکبر جمالی سے وزارت میں ملاقات بھی کریں گے اور نابینا کے علاج کیلئے بھی اپنی جیب سے مالی معاونت کرینگے۔ جاری اعلامیے میں وفاقی وزیر ریلوے حنیف عباسی کا کہنا تھا کہ ریاست محنت کش کے ساتھ کھڑی ہے ، ویلفیئر کیلئے مزید اقدامات کریں گے۔ دوسری جانب وزیراعلیٰ سندھ سید مراد علی شاہ نے بینائی سے محروم قلی کی ویڈیو کا نوٹس لے لیا۔جیکب آباد کے قلی اکبر علی کا بیٹا پبلک ہیلتھ انجینئرنگ سب ڈویژن میں چوکیدار تعینات کردیا گیا جبکہ اکبر علی کی بیٹی کو بینظیر انکم سپورٹ پروگرام میں شامل کروانے کا بھی فیصلہ کرلیا گیا۔نوٹیفکیشن کے مطابق اکبر علی جمالی کو ایک لاکھ روپے مالی معاونت بھی فراہم کی جائے گی۔
