نیویارک (پاکستان نیوز)نیویارک شہر میں بائیسویں سالانہ امیگرنٹ ہیریٹیج ویک کا باضابطہ آغاز ہو گیا ہے جس کا مرکزی عنوان تارکین وطن نیویارک کی طاقت ہیں رکھا گیا ہے۔ میئر کے دفتر برائے مہاجرین کی کمشنر فائزہ این علی نے اس مہم کا افتتاح کرتے ہوئے واضح کیا کہ یہ تقریبات شہر کی ترقی میں تارکین وطن کے غیر معمولی معاشی اور سماجی کردار کو اجاگر کرنے کے لیے منعقد کی جا رہی ہیں۔ میئر زہران ممدانی نے اس موقع پر اپنے پیغام میں کہا کہ نیویارک محنت کشوں کا شہر ہے اور یہاں کی معیشت میں مہاجرین کی شمولیت ہی اسے استحکام بخشتی ہے۔ انہوں نے اس بات پر زور دیا کہ 2026 میں ان کی انتظامیہ کی توجہ معاشی انصاف پر مرکوز ہے تاکہ ہر کارکن کو اس کے حقوق فراہم کیے جائیں اور انہیں استحصال سے بچایا جا سکے۔ کمشنر فائزہ این علی جو خود پاکستانی نڑاد امریکی ہیں نے اپنی گفتگو میں بتایا کہ یہ ہفتہ ان لاکھوں محنت کشوں کے نام ہے جو شہر کی تعمیر و ترقی اور روزمرہ زندگی کی روانی میں ریڑھ کی ہڈی کی حیثیت رکھتے ہیں۔ سرکاری اعداد و شمار کے مطابق غیر دستاویزی مہاجرین کے خاندانوں نے مجموعی طور پر 96.7 بلین ڈالر کے ٹیکس ادا کیے ہیں جو شہر کے انفراسٹرکچر اور عوامی خدمات کے لیے انتہائی اہم ہیں۔ اس سال کی مہم کے دوران مختلف کمیونٹی تنظیموں کے اشتراک سے فن پارے اور ثقافتی پروگرام پیش کیے جائیں گے تاکہ اس شہر کی رنگینی اور تنوع کا جشن منایا جا سکے۔ محکمہ صحت، ثقافتی امور اور چھوٹے کاروبار کی ترقی کے سربراہان نے بھی اس عزم کا اعادہ کیا ہے کہ نیویارک کی ترقی کا راز اس کے مہاجرین کی خوشحالی اور صحت میں پوشیدہ ہے اور انہیں ہر ممکن سہولیات فراہم کی جائیں گی۔
