نیویارک (پاکستان نیوز)اقوام متحدہ کی جاری کردہ رپورٹ کے مطابق رواں برس نومبر کے دوران دنیا کی مجموعی آبادی 8 ارب سے تجاوز کر جائے گی ، جبکہ بھارت آئندہ سال سب سے زیادہ آبادی والے ملک کے طور پر چین سے پہلی پوزیشن چھین لے گا، عالمی یوم آبادی کے موقع پر جاری کردہ ایک رپورٹ میں، اقوام متحدہ نے یہ بھی کہا کہ 1950 کے بعد پہلی بار 2020 میں عالمی آبادی میں اضافے کی شرح 1 فیصد سے نیچے آگئی۔اقوام متحدہ کے تازہ ترین تخمینوں کے مطابق، دنیا کی آبادی 2030 میں تقریباً 8.5 بلین، 2050 میں 9.7 بلین اور 2080 کی دہائی میں تقریباً 10.4 بلین تک پہنچ سکتی ہے۔ 2100 تک اس سطح پر رہنے کی پیش گوئی کی گئی ہے۔رپورٹ میں کہا گیا ہے کہ 2050 تک آبادی میں نصف سے زیادہ متوقع اضافہ صرف آٹھ ممالک میں مرکوز ہو گا: کانگو، مصر، ایتھوپیا، بھارت، نائجیریا، پاکستان، فلپائن اور تنزانیہ۔رپورٹ، “ورلڈ پاپولیشن پراسپیکٹس 2022” دنیا کی آبادی کو اب 7.942 بلین بتاتی ہے اور نومبر کے وسط میں یہ 8 بلین تک پہنچنے کی پیش گوئی کرتی ہے۔
