اسلام آباد / کراچی:
پی آئی اے طیارے کی عبوری تحقیقاتی رپورٹ تیار ہوگئی جس میں طیارے کے کاک پٹ کریو اور ایئرٹریفک کنٹرولر کو حادثے کا ذمہ دار قرار دیا گیا ہے۔
ایکسپریس نیوز کے ذرائع کے مطابق کراچی میں حادثے کا شکار ہونے والے پی آئی اے طیارے کی ابتدائی رپورٹ ایوی ایشن ڈویژن کو موصول ہوگئی ہے جس کے بعد ایوی ایشن ڈویژن میں اعلی سطح کا اجلاس ہوا جس میں سیکرٹری ایوی ایشن، ڈی جی سول ایوی ایشن سمیت دیگر حکام موجود تھے۔
عبوری تحقیقاتی رپورٹ وزیرہوا بازی کو پیش
اجلاس میں ایئرکرافٹ ایکسیڈنٹ اینڈ انوسٹی گیشن ٹیم کے سربراہ بھی موجود تھے جب کہ تحقیقاتی ٹیم کے سربراہ ایئر کموڈور عثمان غنی نے طیارہ حادثے کی رپورٹ اجلاس میں پیش کی اور ابتدائی تحقیقات پر بریفنگ دی۔ ابتدائی تحقیقاتی رپورٹ ائیر کرافٹ ایکسیڈنٹ انویسٹی گیشن بورڈ کے صدر عثمان غنی نے وزیر ہوابازی غلام سرور خان کے حوالے کردی۔
پی آئی اے اور سی اے اے برابر کے ذمہ دار قرار
ذرائع کا کہنا ہے کہ عبوری رپورٹ میں طیارے کے کاک پٹ کریو اور ایئرٹریفک کنٹرولر کو حادثے کا ذمہ دار قرار دیا گیا ہے جب کہ پی آئی اے اور سی اے اے کو برابر کا ذمہ دار قرار دیا گیا، حادثات کی روک تھام میں پی آئی اے اور سول ایوی ایشن اتھارٹی کا طریقہ کار بھی ناکام قرار دیا گیا ہے۔
حادثہ انسانی غلطی سے پیش آنے کا شبہ ظاہر کیا گیا
ذرائع نے کہا کہ بلیک باکس ڈیٹا سے طیارہ میں کسی تکنیکی خرابی کے شواہد نہیں ملے، ابتدائی رپورٹ میں حادثہ انسانی غلطی سے پیش آنے کا شبہ ظاہر کیا گیا، حادثے کے شکار طیارے کے آلات اور سسٹمز کی جانچ کا کام ابھی جاری ہے۔
دوبارہ ٹیک آف کے دوران انجن فیل ہوئے
ابتدائی رپورٹ میں پائلٹس اور اے ٹی سی عملہ کی تواتر سے غلطیوں کی نشاندہی کی گئی، پہلی لینڈنگ پر جہاز 9 ہزار میٹر کے رن وے کے درمیان میں آکر ٹکرایا، پائلٹ دوبارہ اڑا کر لے گیا، پہلی لینڈنگ کے بعد پائلٹ کو جہاز اڑانا نہیں چاہیے تھا، دوبارہ ٹیک آف کے بعد جہاز کو 17 منٹ تک فضا میں اڑایا گیا، اس دوران انجن فیل ہوگئے۔
رپورٹ میں کہا گیا کہ جہاز شروع سے ہی زائد رفتار اور اونچائی پر آرہا تھا، لینڈنگ پوزیشن میں آنے پر بھی جہاز کی اونچائی مقررہ ہائیٹ سے زیادہ تھی، پہلی ناکام لینڈنگ کے 12 گھنٹے بعد تک جہاز کے پرزے رن وے پر موجود رہے، ایئر سائٹ یونٹ نے اکھٹے نہیں کئے، قانون کے مطابق حادثہ کے بعد اے ٹی سی عملہ کو ریلیوو کر دینا چاہئے تھے لیکن شام سات بجے تک مکمل ڈیوٹی کروائی گئی۔
پہلی بار کسی طیارہ حادثے کی رپورٹ منظرعام پر لائی جائے گی
دوسری جانب فرانس سے آنے والی تحقیقاتی ٹیم نے بلیک باکس ڈی کوڈنگ کی رپورٹ مرتب کرکے پی آئی اے حکام کو دی تھی جب کہ پہلی مرتبہ کسی بھی طیارہ حادثے کی رپورٹ قومی اسمبلی میں منظرعام پر لائی جائے گی، طیارے حادثے کی ابتدائی رپورٹ آج وزیر اعظم کو پیش کی جائے گی، وفاقی وزیر ہوا بازی ان کو رپورٹ پیش کریں گے۔
ایوی ایشن حکام کا اظہار لاتعلقی
ترجمان ایوی ایشن ڈویژن کی جانب سے منظر عام پر آنے والی عبوری رپورٹ کو حقائق کے برعکس قراردیا گیا ہے۔ان کا کہنا ہے کہ طیارہ حادثے کی وجوہات کے بارے میں حتمی تفصیلات حکومت کی جانب سے جلد منظر عام پر لائی جائیں گی۔ ترجمان ہوابازی کے مطابق منظر عام پر آنے والے باتصویر دستاویز قطعی طور پر تحقیقات پر مامور ادارے کی مرتب کردہ نہیں ہے۔
وزیراعظم سے وزیر ہوا بازی غلام سرور کی ملاقات
وزیراعظم عمران خان سے وزیر ہوا بازی غلام سرور خان نے ملاقات کی اور کراچی طیارہ حادثہ کی تحقیقاتی رپورٹ وزیراعظم کو پیش کردی، وزیر ہوابازی نے وزیراعظم کو کراچی طیارہ حادثہ کی وجوہات سے آگاہ کیا۔ کراچی طیارہ حادثہ کی تحقیقاتی رپورٹ آج پارلیمنٹ میں بھی پیش کرنے کا امکان ہے۔
اس سے قبل وزیراعظم عمران خان سمیت متعلقہ حکام کی جانب سے حادثے کی ہر پہلو سے تحقیقات کرنے کا حکم دیا گیا تھا اور وفاقی وزیر برائے ہوا بازی غلام سرور خان نے اعلان کیا تھا کہ طیارہ حادثے کی شفاف تحقیقات کے بعد ذمہ دارن کو سامنے لایا جائے گا۔
واضح رہے پی آئی اے کے مسافر طیارہ 22 مئی کو کراچی ایئرپورٹ کے قریب آبادی پر گرگیا تھا، طیارے میں 99 افراد سوار تھے جن میں سے کیتان اور کیبن کویو کے 12 ملازمین سمیت 97 افراد جاں بحق ہوئے تھے جب کہ حادثہ میں معجزانہ طور پر 2 مسافر محفوظ رہے تھے، حادثہ میں محفوظ رہنے والوں میں سی ای او بنک آف پنجاب ظفر مسعود اور ایک مسافر زبیر شامل ہیں۔
’’رپورٹ بدھ کو اسمبلی میں پیش کی جائے گی‘‘
پیر کے روز قومی اسمبلی کے اجلاس میں اظہار خیال کرتے ہوئے وفاقی وزیر ہوابازی غلام سرور خان نے کہا کہ بدھ کو نہ صرف کراچی میں ہونے والے پی آئی اے کے طیارے کے حادثے کی رپورٹ ایوان میں پیش کی جائے گی بلکہ گزشتہ برسوں میں ہونے والے حویلیاں میں ہونے والے طیاروں کے حادثات سے متعلق بھی تفصیلات سے اسمبلی کو آگاہ کیا جائے گا۔
ذرائع کے مطابق پی آئی اے کے حویلیاں کے قریب گر کر تباہ ہونے والے اے ٹی آر ساختہ طیارے کی رپورٹ مرتب کرنے کے بعد وزیرہوابازی کو پیش کردی گئی، حویلیاں طیارہ حادثے کی رپورٹ بھی جلد عوام کے سامنے لائے جانے کا امکان ہے. حویلیاں طیارہ حادثے میں جنید جمشید سمیت دیگر مسافر جانبحق ہوئے تھے. حویلیاں طیارہ حادثے کی رپورٹ بھی ائرکرافٹ ایکسیڈنٹ اینڈ انویسٹی گیشن نے مرتب کی ہے. پی کے 661 سات دسمبر 2016 کو حویلیاں کے پاس گرکر تباہ ہوا تھا.طیارے میں سوار عملے سمیت 47 افراد حادثے میں جاں بحق ہوئے تھے۔
