واشنگٹن (پاکستان نیوز)ہلٹن ہوٹل میں منعقد ہونیوالا وائٹ ہاؤس کے نامہ نگاروں کی تنظیم کا سالانہ پروقار عشائیہ اس وقت خوف و ہراس اور افراتفری کے منظر میں بدل گیا جب ایک مسلح شخص نے سیکیورٹی حصار توڑ کر اندر داخل ہونے کی کوشش کی۔ ہفتے کی رات ساڑھے آٹھ بجے کے قریب جب صدر ڈونلڈ ٹرمپ اور خاتون اول میلانیا ٹرمپ اسٹیج پر موجود فنکار کے ساتھ گفتگو میں مصروف تھے، اسی دوران ہوٹل کے بیرونی حصے میں ایک شخص بندوق لہراتے ہوئے حفاظتی چوکیوں کی جانب لپکا۔ جاری کردہ ویڈیو کے مطابق خفیہ ادارے کے اہلکاروں نے فوری طور پر اس کا تعاقب کیا اور فائرنگ کے تبادلے کے بعد اسے بال روم میں داخل ہونے سے پہلے ہی قابو کر لیا۔ ہوٹل کے اندر موجود مہمان جو اس وقت رات کے کھانے میں مصروف تھے، باہر سے آنے والی گولیوں کی آوازیں سن کر سہم گئے۔ صدر ٹرمپ نے بعد ازاں بتایا کہ انہوں نے ابتدائی طور پر ان آوازوں کو پلیٹوں کے گرنے کا شور سمجھا تھا، لیکن جلد ہی صورتحال واضح ہو گئی۔ مسلح اہلکاروں نے ہال کے تمام دروازوں کا کنٹرول سنبھال لیا اور حاضرین کو زمین پر لیٹنے کی ہدایت کی۔ سیکیورٹی اہلکاروں نے نائب صدر جے ڈی وینس کو فوری طور پر اسٹیج سے ہٹایا جبکہ صدر اور خاتون اول کو ایک حفاظتی حصار میں لے کر ہوٹل کے محفوظ کمرے میں منتقل کر دیا گیا۔ اس دوران صحافی وولف بلٹزر سمیت وہ افراد جو ہال سے باہر موجود تھے، براہ راست خطرے کی زد میں آگئے۔ بلٹزر کے مطابق وہ گولیوں کی گونج سن کر زمین پر گر گئے جبکہ پولیس اہلکاروں نے انہیں بچانے کے لیے اپنی ڈھال فراہم کی۔ اس پرتشدد واقعے نے دارالحکومت کی اعلیٰ سطحی تقریب کو ایک مجرمانہ منظر نامے میں تبدیل کر دیا، تاہم سیکیورٹی کی مستعدی سے تمام اہم شخصیات محفوظ رہیں۔
