ملکی شوبز ستاروں نے جشن آزادی کے موقع پر مداحوں کے لیے پیغامات بھیجے اور تصاویر شیئر کیں۔
دنیا بھر میں موجود پاکستانی آج 74واں جشن آزادی جوش و جذبے کے ساتھ منا رہے ہیں تاہم کورونا وائرس کے باعث پاکستان سمیت دنیا بھر میں جشن آزادی کی تقریبات کو محدود رکھا گیا ہے البتہ سیاسی وسماجی شخصیات سمیت شوبز ستاروں نے بھی قوم کو آزادی کی مبارکباد دی۔
اداکار شان شاہد نے سماجی رابطے کی ویب سائٹ پر ٹوئٹر کے ذریعے قوم کو مبارکباد دی۔ اپنے پیغام میں انہوں نے کہا کہ پاکستان میرا پیار، جذبہ، حب الوطنی ہے اور میں دعا کرتا ہوں کہ یہ قوم سبز وسفید رنگ کے پرچم میں یوں ہی متحد رہیں، میں ہمیشہ ملک سے محبت اور حفاظت کا عہد لیتا ہوں۔
اداکار حمزہ علی عباسی نے اپنی ٹوئٹ میں کہا کہ اللہ ہمیں وطن سے محبت کے پیغام کو سمجھنے کی توفیق عطا فرمائیں اور پاکستان ہمیشہ سلامت رہے۔
اداکار عدنان صدیقی نے بھی ٹوئٹر کے ذریعے جشن آزادی کی مبارک باد دی اور ساتھ ہی ایک ویڈیو بھی شیئر کی۔ اپنے بیان میں انہوں نے کہا کہ وطن کی آزادی کے لیے تاریخ ہمارے آباؤ اجداد کے خون سے بھری پڑی ہے۔
اداکارہ وینا ملک نے بھی ٹوئٹر کے ذریعے مبارکباد دی۔ انہوں نے جشن آزادی مناتے ہوئے ایک ویڈیو شیئر کی جس میں وہ سبزحلالی پرچم کو چوم رہی ہیں۔
