سوشل میڈیا پر اداکارہ اور ماڈل عفت عمر کو ماضی کے ہینڈ سم اداکار راحت کاظمی کے حوالے سے اپنے ایک غیر معمولی بیان پر شدید تنقید کا سامنا تھا جس پر عفت عمر نے ایسی وضاحت پیش کی جو صارفین کو بالکل پسند نہ آئی اور وہ مزید ٹرولنگ کا شکار ہوگئیں۔
عفت عمر کی پریشانی کا آغاز ان کے آن لائن پروگرام ’’ سے اٹ آل ودھ عفت عمر‘‘ میں اپنے پہلے پروجیکٹ کے ذکر سے ہوا، جس میں عفت عمر نے بتایا کہ ایک سین میں مجھے اپنے والد راحت کاظمی کے گلے لگنا تھا اور میں نے راحت کاظمی سے انسیت کی وجہ سے یہ سین بار بار ری ٹیک کرایا تھا۔
اس وقت کو یاد کرتے ہوئے عفت عمر نے مزید کہا کہ دراصل میں اپنی خواہش پوری کررہی تھی کیوں کہ مجھے راحت کاظمی بہت پسند تھے، یہ جملے وائرل ہونے پر سوشل میڈیا صارفین نے عفت عمر پر تنقید کے تیر برسانے شروع کردیئے۔
سوشل میڈیا صارفین کا کہنا تھا کہ اپنے باپ کی عمر کے شخص راحت کاظمی سے جو کہ ڈرامے میں بھی عفت کے والد کا کردار ادا کررہے تھے، ان سے عفت عمر کا اپنی ’’رومانس کی خواہش‘‘ کے لیے گلے ملنے کا عمل افسوس ناک ہے۔
سوشل میڈیا پر ابھی ٹرولنگ کی تند و تیز بارش جاری ہی تھی کہ عفت عمر نے انسٹاگرام پر راحت کاظمی کے ساتھ اس سین کی تصویر کی شیئر کی جس میں راحت کاظمی (والد) اپنی بیٹی (عفت عمر) کو گلے لگا رہے ہیں اور اس کا کیپشن لکھا معصومانہ جھپی۔
سوشل صارفین جو پہلے ہی اداکارہ کے ریمارکس سے خوش نہ تھے اب اس وضاحت پر مزید برہم ہوگئے۔ مداحوں کا کہنا تھا کہ کہاں یہ عمل ان کی رومانس کی خواہش کے لیے تھا اور اب اسے ’’معصومانہ جھپی‘‘ کہا جا رہا ہے۔ یہ دونوں باتیں ایک دوسرے سے بالکل مختلف ہیں۔
