نیویارک (پاکستان نیوز)مشی گن کے شہر ڈیئربورن میں عبداللہ حمود نے ایک بار پھر بھاری اکثریت سے کامیابی حاصل کر کے اپنی قیادت کا لوہا منوا لیا ہے۔ وہ اس اہم امریکی شہر کے پہلے مسلمان اور عرب نڑاد میئر ہیں جنہوں نے اپنے دوسرے دور اقتدار کا آغاز 2026 کے اوائل میں ایک پروقار تقریب سے کیا۔ عبداللہ حمود کی یہ فتح صرف ایک انتخابی کامیابی نہیں بلکہ امریکی جمہوری ڈھانچے میں مسلمانوں کے بڑھتے ہوئے سیاسی اثر و رسوخ کی علامت ہے۔ انہوں نے حالیہ انتخابات میں 70 فیصد سے زائد ووٹ حاصل کر کے ثابت کر دیا کہ ان کی کارکردگی پر عوام کا بھرپور اعتماد ہے۔ میئر عبداللہ حمود نے اپنی نئی مدت میں شہر کی ترقی کے لیے 100 ملین ڈالر سے زائد کے وسائل فراہم کرنے کا عزم کیا ہے۔ ان کی ترجیحات میں عوامی صحت، ماحولیاتی تحفظ اور شہر کے بنیادی ڈھانچے کی جدید کاری شامل ہے۔ انہوں نے حال ہی میں ایک جدید ڈیجیٹل نظام متعارف کروانے کا اعلان کیا ہے جس کے ذریعے شہریوں کو بلدیاتی سہولیات تک رسائی میں آسانی ہوگی۔ ان کی قیادت میں ڈیئربورن کو معاشی طور پر مستحکم بنانے کے ساتھ ساتھ سماجی انصاف کی فراہمی پر بھی توجہ دی جا رہی ہے۔ زہران ممدانی جیسے رہنماؤں کے ساتھ ساتھ عبداللہ حمود کا ابھرنا اس بات کی نشاندہی کرتا ہے کہ امریکہ میں اب مسلمان قیادت کلیدی کردار ادا کر رہی ہے۔ یہ رپورٹ اس حقیقت کو اجاگر کرتی ہے کہ تعلیم اور عوامی خدمت کے ذریعے تارکین وطن کی نئی نسل سیاسی افق پر نمایاں ہو رہی ہے۔
