کیلی فورنیا (پاکستان نیوز)مشہور ریٹیلر ایڈی باور نے ایک صدی سے زائد عرصے تک کاروبار کرنے کے بعد امریکہ اور کینیڈا میں اپنے تمام 174 فزیکل اسٹورز بند کرنے کی تیاریاں مکمل کر لی ہیں۔ کمپنی نے عدالت میں جمع کرائی گئی دستاویزات میں 1 ارب ڈالر سے زائد کے قرضوں کا اعتراف کیا ہے، جس کی وجوہات میں فروخت میں کمی، سپلائی چین کی مشکلات، مہنگائی اور ٹیرف سے متعلق غیر یقینی صورتحال شامل ہیں۔ریاست کیلیفورنیا میں اس فیصلے سے مجموعی طور پر 13 مقامات متاثر ہوں گے، جن میں الپائن، اینڈرسن، کورٹے مڈیرا، فوسم، فریسنو، گلروئے، ملپیٹاس، پیٹالوما، روز ویل، سان کلیمینٹے، ٹولیر، ویکاول اور ووڈ لینڈ ہلز کے اسٹورز شامل ہیں۔ کمپنی نے یہ انتہائی قدم دیوالیہ پن کی کارروائی کے دوران اپنے ریٹیل پورٹ فولیو کو فروخت کرنے میں ناکامی کے بعد اٹھایا ہے۔ کسی خریدار کی عدم موجودگی میں اب تمام اسٹورز پر اسٹاک ختم کرنے کے لیے سیل جاری ہے، جب تک کہ کوئی آخری لمحے کی پیشکش سامنے نہ آ جائے۔عدالتی کارروائی کے مطابق ایڈی باور ایل ایل سی نے 3 مارچ کی ڈیڈ لائن تک کوئی مناسب بولی موصول نہ ہونے پر 6 مارچ کو ہونے والی نیلامی منسوخ کر دی تھی۔ کمپنی نے رواں سال 9 فروری 2026 کو نیو جرسی کی عدالت میں دیوالیہ پن سے بچاؤ کے لیے چیپٹر 11 کے تحت درخواست دائر کی تھی۔ اگر کوئی خریدار سامنے نہیں آتا تو توقع ہے کہ 30 اپریل 2026 تک تمام اسٹورز مکمل طور پر بند کر دیے جائیں گے۔تاہم ایڈی باور برانڈ کا نام ختم نہیں ہوگا اور یہ دیگر ذرائع سے اپنی مصنوعات کی فروخت جاری رکھے گا۔ اس دوران اسٹورز پر خریداری کرنے والے صارفین کے لیے چند اہم ہدایات جاری کی گئی ہیں:گفٹ کارڈز صرف 12 مارچ 2026 تک اسٹورز میں استعمال کیے جا سکیں گے اور انہیں آن لائن استعمال نہیں کیا جا سکے گا۔ریوارڈ پوائنٹس کے استعمال کی آخری تاریخ بھی 12 مارچ مقرر کی گئی ہے۔اسٹورز نے اب کسی بھی قسم کی واپسی یا تبدیلی قبول کرنا بند کر دی ہے اور تمام فروخت کو حتمی قرار دیا گیا ہے۔
