واشنگٹن (پاکستان نیوز)امریکی شہریت اور امیگریشن سروسز نے اپنی پالیسی میں ایک اہم اور بڑی تبدیلی کا اعلان کیا ہے جس کے تحت گرین کارڈ اور دیگر امیگریشن کے لیے جمع کرائی جانے والی نامکمل درخواستوں کو فوری طور پر مسترد کر دیا جائے گا۔ اس نئی ہدایت نامے کے مطابق اگر درخواست کے ساتھ مطلوبہ اہم ترین دستاویزات اور ثبوت موجود نہ ہوں تو امیگریشن افسران درخواست گزار کو آگاہ کیے بغیر ہی کیس کو منسوخ کرنے کے مجاز ہوں گے۔ اس فیصلے کا بنیادی مقصد امیگریشن کی کارروائی کو تیز بنانا اور نامکمل فائلوں کے بوجھ کو کم کرنا ہے۔اس سے قبل امیگریشن افسران کی جانب سے دستاویزات کی کمی کو پورا کرنے کے لیے درخواست گزار کو خصوصی نوٹس یا ثبوت فراہم کرنے کا موقع دیا جاتا تھا، تاہم اب افسران ایسے کسی نوٹس یا تنبیہ کو جاری کرنے کے پابند نہیں رہے ہیں۔ قانون اور امیگریشن کے ماہرین نے اس تبدیلی پر تشویش کا اظہار کرتے ہوئے خبردار کیا ہے کہ اس اقدام سے تارکینِ وطن کی مشکلات میں شدید اضافہ ہو سکتا ہے کیونکہ چھوٹی سی غلطی بھی درخواست کی منسوخی کا سبب بن سکتی ہے۔ماہرین نے تمام امیدواروں کو مشورہ دیا ہے کہ وہ گرین کارڈ یا امیگریشن کی فائل جمع کراتے وقت تمام لازمی شناختی، مالیاتی اور قانونی کاغذات کی موجودگی کو ہر صورت یقینی بنائیں۔ اگر درخواست میں دستخط، پیدائشی سرٹیفکیٹ، مالی ثبوت یا دیگر ضروری شواہد میں سے کوئی ایک بھی عنصر رہ گیا تو حکام کسی رعایت کے بغیر درخواست کی منسوخی کا فیصلہ سنا دیں گے۔
