بھارت کے مسلمانوں کے لئے ایک بار پھر یہ جال پھینکا جارہا ہے کہ تمہاری نجات ایک سیکولر معاشرے اور سیکولر نظام حکومت میں ہے۔ یہ سیکولر معاشرہ کیا آسمان سے فرشتے یا خلا سے جنات نازل ہو کر ترتیب دیتے ہیں۔ اسے زمین پر بسنے والے انسانوں کی اکثریت ہی ترتیب دیتی ہے۔ اسی اکثریت کا نام جمہوریت ہے، اور اسی جمہوریت کا مکروہ ترین چہرہ صرف نریندر مودی نہیں بلکہ اسکے پیچھے 1925 ئ میں قائم ہونے والی راشٹریا سیوک سنگھ کے نظریات کی جیت ہے۔ پچانوے سال کی مسلسل جدوجہد یہ ثابت کرتی ہے کہ سیکولرزم نام کی فاختہ جو دوسرے مذاہب کے احترام کا دعویٰ کرتی ہے اسکا ہندوطرز معاشرت و تہذیب میں گزر ممکن نہیں اور یہ بھارت کوئی پاکستان بھی نہیں ہے کہ فوج کے بل بوتے پر کوئی پرویز مشرف اٹھے اور روشن خیالی کے نام پر سیکولر اخلاقیات نافذ کر دے۔ جب سے بھارت میں ہنگامے شروع ہوئے ہیں، میرے ملک کے دانشوروں کو فکر لگی ہوئی ہے کہ اگر ایک دفعہ بھارتی معاشرے سے سیکولر منافقت کا لبادہ اتر گیا، اور ہندوو¿ں کا تعصب انکے جمہوری ووٹ سے مکمل طور پر نافذ ہوگیا، پچیس کروڑ بھارتی مسلمان اپنی ہی سرزمین پر اجنبی ہو گئے تو دو قومی نظریے کی حقیقت یوں روز روشن کی طرح واضح ہوجائے گی کہ پھر اسے غلط ثابت کرنے کیلئے کسی ابوالکلام آزاد کی پیش گوئیوں کا سہارا نہیں لیا جا سکے گا۔ لیکن اب تو ہو گیا اور میرے سیکولر نواز مذہبی سکالر اور خالص سیکولر لبرل لکھاری بھی منہ چھپاتے پھرتے ہیں۔ ہمارا ایمان اس دو قومی نظریہ پر متزلزل کیا جاتا تھا، ہمارے قائدین کی سیاسی بصیرت پر سوال اٹھائے جاتے تھے۔ پاکستان ستربر س سے اس بدترین اور جھوٹ پر مبنی پراپیگنڈے کی زد پر تھا جس کے سرخیل پہلے کیمونسٹ دانشور، شاعر، ادیب تھے اور آج سیکولر دانشور، شاعر، ادیب، صحافی، اور کچھ مذہبی دانشور اسکے نقیب ہیں۔ لیکن بھارت میں مسلمان دشمنی کا جو آتش فشاں پھٹا ہے اس نے75 سالہ سیکولرزم، لبرل ازم اور جمہوریت کے غلیظ چہرے سے نقاب الٹ کر رکھ دیا ہے اور اندر سے ڈریکولا کی طرح کا خون پینے والا مسلمان دشمن چہرہ برآمد ہوا ہے۔ کیا یہ صرف آر ایس ایس، بھارتیہ جنتا پارٹی یا بجرنگ دل جیسی تنظیموں اور پارٹیوں کا کیا دھرا ہے۔ ان سب کو شدت پسند بتا کر یہ ثابت کرنے کی کوشش کی جارہی ہے جیسے 1947 ئ سے لے کر اب تک سیکولر لبرل کانگریس کے ادوار میں بھارت کے مسلمان بہت سکھ کا سانس لیتے تھے اور یہ اچانک معاشرے میں شدت پسندی بی جے پی کی وجہ سے آگئی ہے۔ کانگریس کا بیج بھی اسی ہندو معاشرت سے اٹھا تھا، فرق صرف یہ ہے کہ چانکیہ کے افکار پر عمل کرتے ہوئے کانگریس رہنماو¿ں نے اپنے چہرے پر سیکولرازم کی منافقت کا غلاف چڑھا رکھا تھا۔ بالکل ویسے ہی جیسے تمام مغربی معاشرے جو 1095 ءسے لے کر 1270 ءتک لڑنے والی صلیبی جنگوں کی نفرت سینوں میں چھپا کر اسلام اور مسلمان دشمنی کی روایت آج بھی لیے ہوئے ہیں، مگر انہوں نے چہروں پر سیکولرزم لبرلزم اور جمہوریت کی منافقت کا غلاف چڑھا ہوا ہے۔ زمانہ بدل چکا، بھارت میں نریندر مودی کی جیت نے یہ نقاب الٹا، ویسے ہی امریکہ اور یورپ کے ممالک میں اسلام فوبیا کی پرچارک اور مسلمان دشمن سیاسی پارٹیوں کی فتح نے بھی سیکولر نظریے کی قلعی کھول کر رکھ دی ہے۔ برصغیر میں نہ صرف مسلمان دشمنی بلکہ ہر دوسرے دھرم سے دشمنی کی تاریخ بہت پرانی ہے۔ اس کی وجہ یہ ہے کہ ہندو اس سرزمین پر صرف اپنا حق سمجھتے ہیں اور دوسروں کو ناپاک۔ ہر بڑے مندر کی بنیادوں میں کسی دوسرے دھرم اور مذہب کی عمارت دفن ہے۔ اجنتا اور ایلورا کی غاروں کی دیواروں پر بدھ مت کے جاتکاز کی تصویریں تو ہیں لیکن درمیان میں شیولنگ اور دیگر دیوتاو¿ں اور دیویوں کے مجسمے رکھ کر انہیں ہندو مندروں میں تبدیل کردیا گیا ہے۔ ہندومت کا دوسرا بڑا مقدس مقام کٹاس راج بدھ مت کے مندروں کو گرا کر بنایا گیاتھا اور آج بھی اس کے ایک طرف بدھ مت کے دور کے آثار ملتے ہیں۔ دوسرے مذاہب سے نفرت ہندوستان کی تاریخ میں بار بار ابھرتی رہی اور گپتہ کے سنہری ہندو دور کو واپس لانے کی کوشش بار بار ہوتی رہی۔ احمد شاہ ابدالی سے مرہٹوں کی شکست کے تقریبا ڈیڑھ سو سال بعد1886ءمیں بنگال قومیت کے ساتھ ہندومت کی نشآ ثانیہ کا آغاز ہوا تو ہندو میلوں کے تصور نے جنم لیا۔ پہلی دفعہ ان میلوں میں ہندوو¿ں کو عسکری مہارتیں یعنی شمشیر سازی، خنجر چلانا، لٹھ بازی وغیرہ سکھائے جاتے۔ سوامی دیانند سرسوتی نے اسی دوران شدھی کی تحریک شروع کی جس کا مقصد مسلمانوں اور عیسائیوں کو دوبارہ ہندو بنانا تھا۔ اس کے ساتھ مہاراشٹر میں بال گنگا دھر تلک نے گنپتی اور شیو جی کے تہواروں کو منانے کا سلسلہ شروع کیا۔ ہر گاو¿ں کی سطح پر انوسلان سمپتیاں یعنی انتظامی کمیٹیاں بنائی جاتیں جن میں مسلمانوں کو شامل نہیں کیا جاتا تھا۔ یہ تمام کمیٹیاں 1922ءتک ایک ہندو مہا سبھا میں ڈھل گئیں اور اس کا صدر ساورکر کو منتخب کیا گیا تو اس نے اگلے سال اپنی کتاب ”ھندوتوا” شائع کی۔ ”ھندوتوا ”کے مطابق بھارت میں پیدا ہونے والے فرد کے لیے یہ زمین پترو بھومی (Fathers land) ہی نہیں پنیا بھومی (مقدس سرزمین) بھی ہے۔ اس لیے یہاں پیدا ہونے والا ہر شخص پیدائشی طور پر ہندو ہے۔ اس لیے یہاں کسی کو کسی دوسرے مذہب کو اختیار کرنے کی اجازت نہیں دی جاسکتی۔ واپس ہندو ہو جاو¿ یا بھارت چھوڑ دو۔ اس نظریہ کی گونج ایک مکمل صدی سے جاری ہے جس کی فتح آج جمہوری طور پر نریندر مودی کی حکومت کی صورت میں مکمل ہو چکی ہے۔ لیکن آزادی کے بعد سے آج تک کے ستربر سوں میں کانگریس اور دیگر سیکولر حکومتوں میں بھی مسلمان اور اسلام دشمنی اسی طرح پروان چڑھتی رہی۔ احمدآباد کے 1969 ءکے مسلم کش فسادات جس میں ہزاروں مسلمانوں کا قتل عام ہوا،جو آزادی کی صرف دو دہائیوں کے بعد ہوئے تھے، پورے ہندوستان میں نفرت کی آگ سلگا گئے، 1970 ءمیں بھیوانڈی اور جل گاو¿ں میں ہونے والے مسلم کش فسادات کے بارے میں جوڈیشل رپورٹ اس دور کی ظالم، مسلمان دشمن سیکولر حکومت کا ایک بھیانک نقشہ کھینچتی ہے۔ رپورٹ کہتی ہے ”یہ نفرت اور تشدد،تعصب اور دروغ حلفی کی سرزمین پر ایک تنہا،مشقت طلب اور تھکا دینے والا سفر تھا۔راستے میں ملنے والے لوگ شقی القلب اور انسانوں کے خون کے پیاسے تھے۔اس سفر میں وہ سیاستدان ملے جو فرقہ واریت نفرت اور مذہبی جنونیت کا دھندا کرتے ہیں۔ ایسے مقامی رہنما ملے جو تفرقے اور تلخی کے بیج بو کر اقتدار تک رسائی پاتے ہیں۔ ایسے پولیس افسر اور سپاہی ملے، جھوٹ اور فریب پر کاربند لوگ اور قتل و خونریزی کا کاروبار کرنے والے ملے”۔ یہ پچاس سال پہلے کے عظیم سیکولر بھارت کا نقشہ ہے۔ وہ سیکولر کانگرس جسکے چہرے پر ایک لاکھ کشمیریوں کا خون اور ہزاروں مسلم کش فسادات کی رنگولی ہے۔ اس کے باوجود میرے ملک کا دانشور بھارتی مسلمانوں کو ایک اور فریب دینا چاہتا ہے کہ تمہاری نجات صرف سیکولرازم میں ہے۔ میرے نبی نے فیصلہ کردیا، ”کفر ایک ملت واحدہ ہے”(ترمذی) اور سیکولرزم تو آج کے دور کا کفر نہیں بلکہ منافقت ہے۔ امریکہ سے لے کر بھارت تک صرف اسلام دشمنی کو خوبصورت لبادے میں چھپانے کا دوسرا نام سیکولرزم ہے۔ لیکن بھارت کا مسلمان خوب جانتا ہے کہ وہ سیکولر نعرے کو ستر سال سے بھگت رہا ہے۔ اسے معلوم ہے کہ بی جے پی کی مسلمان دشمنی اور کانگریس کی سیکولرحکومت صرف اسی کا خون بہاتے ہیں۔ لیکن بی جے پی کی مسلمان دشمنی اسے احساس غیرت دلا کر متحد کرتی ہے اور کانگریس کی سیکولرزم اسے پست کردار اور بزدل بناتی ہے۔
٭٭٭
