نیویارک (پاکستان نیوز)کانگریس کے وسط مدتی انتخابات کا معرکہ قریب آتے ہی ملک بھر میں سیاسی سرگرمیاں انتہائی تیز ہو چکی ہیں اور تازہ ترین عوامی سروے کے نتائج نے ریپبلکنز کی تشویش میں اضافہ کر دیا ہے۔ فوربس کے تجزئیے اور نیویارک ٹائمز سمیت سینیٹ سروے کے نئے اعداد و شمار کے مطابق ڈیموکریٹک پارٹی کو ایوانِ نمائندگان پر کنٹرول حاصل کرنے کے لیے اپنے حریفوں پر 8 پوائنٹس کی نمایاں اور مضبوط برتری حاصل ہو گئی ہے۔ ووٹرز کا یہ واضح رجحان ظاہر کرتا ہے کہ عوام کی بڑی تعداد موجودہ معاشی حالات، پالیسی ساز اقدامات اور روزمرہ زندگی کے مسائل کو مدنظر رکھتے ہوئے ڈیموکریٹس کے حق میں رائے قائم کر رہی ہے۔امریکی قانون ساز ایوانوں کی برتری کے لیے جاری اس سخت مقابلے میں دونوں جماعتیں ووٹرز کو اپنی جانب راغب کرنے کے لیے بھرپور کوششیں کر رہی ہیں، تاہم حالیہ عمومی ووٹنگ ترجیحات میں ڈیموکریٹس کی برتری مسلسل برقرار ہے۔ سیاسی ماہرین کا ماننا ہے کہ اگر عوامی ووٹنگ کا یہی انداز رائے شماری کے دن تک قائم رہا تو ڈیموکریٹک پارٹی ایوانِ نمائندگان میں اکثریت حاصل کر کے ایک بڑی سیاسی کامیابی حاصل کرنے میں کامیاب ہو جائے گی۔ دوسری جانب ریپبلکن پارٹی نے بھی الیکشن میں اپنی پوزیشن بہتر بنانے اور ووٹرز کا اعتماد دوبارہ حاصل کرنے کے لیے انتخابی مہم کو مزید تیز کر دیا ہے۔ دونوں جماعتوں کے رہنما قانون سازی اور ملکی معیشت کے مستقبل پر اپنے نقطہ نظر کو عوام کے سامنے پیش کر رہے ہیں تاکہ حتمی انتخابی نتائج کو اپنے حق میں موڑ سکیں۔
