واشنگٹن (پاکستان نیوز) امریکہ نے بھارتی نژاد امریکی سکھ کے قتل میں بھارت کے ملوث ہونے کے الزامات کو سنجیدہ قرار دیتے ہوئے کہا ہے کہ اس حوالے سے معاملات زیر تفتیش ہیں، اس سلسلے میں سینئر اسٹیٹ ڈیپارٹمنٹ اہلکاروں نے قانون دانوں کو یقین دہانی کرائی ہے کہ بائیڈن حکومت اس معاملے کو سنجیدگی سے دیکھ رہی ہے، انتخابات کے بعد پاکستان کے بارے میں کانگریس کی ذیلی کمیٹی کی سماعت میں، جنوبی اور وسطی ایشیا کے اسسٹنٹ سیکریٹری آف اسٹیٹ، ڈونلڈ لو نے کہا کہ واشنگٹن نئی دہلی کے ساتھ “جلد اور شفاف طریقے سے” کام کرنے اور “انصاف کو یقینی بنانے” کے لیے کام کر رہا ہے۔ایوان کی ذیلی کمیٹی برائے مشرق وسطیٰ، شمالی افریقہ اور وسطی ایشیا میں رینکنگ ممبر ڈین فلپس نے سیکرٹری لو سے پوچھا کہ کیا انتظامیہ ہندوستان کے خلاف سرکاری سرزمین پر ایک سکھ امریکی کو قتل کرنے کی سازش سے منسلک ہونے کے الزامات کے لیے ہندوستان کے خلاف پابندیوں پر غور کر رہی ہے، ڈونلڈ لو اس حوالے سے جواب کو گول کر گئے۔
