اسلام آباد (پاکستان نیوز) چیف آف ڈیفنس فورسز اور آرمی چیف فیلڈ مارشل سید عاصم منیر نے دورہ سعودی عرب کے دوران سعودی عرب کے وزیرِ دفاع شہزادہ خالد بن سلمان بن عبدالعزیز آل سعود سے ملاقات کی جس میں باہمی دلچسپی کے امور پر تفصیلی تبادلہ خیال کیا گیا۔ آئی ایس پی آرکے مطابق ملاقات میں علاقائی سکیورٹی کی صورتحال، دفاعی و عسکری تعاون، سٹریٹجک شراکت داری اور بدلتے ہوئے جیوپولیٹیکل چیلنج پر غور کیا گیا۔ اس موقع پر پاکستان اور سعودی عرب کے درمیان گہرے، تاریخی اور برادرانہ تعلقات کی ایک بار پھر توثیق کی گئی۔ خادمِ حرمین شریفین شاہ سلمان بن عبدالعزیز آل سعود کے شاہی فرمان کے تحت فیلڈ مارشل سید عاصم منیر کو مملکتِ سعودی عرب کا اعلیٰ ترین قومی اعزاز کنگ عبدالعزیز میڈل (excellentکلاس) عطا کیا گیا۔ یہ اعزاز فیلڈ مارشل عاصم منیر کی شاندار عسکری خدمات، مؤثر قیادت اور پاکستان و سعودی عرب کے مابین دفاعی تعاون، سٹریٹجک ہم آہنگی اور ادارہ جاتی روابط کے فروغ میں ان کے کلیدی کردار کا اعتراف ہے۔ خطے میں امن و استحکام کیلئے انسدادِ دہشت گردی اور سکیورٹی کے شعبوں میں مسلسل تعاون سمیت ان کی کاوشوں کو بھی سراہا گیا۔ سعودی قیادت نے فیلڈ مارشل کی پیشہ ورانہ صلاحیتوں اور سٹریٹجک وژن کی تعریف کی۔ دونوں ممالک کے دیرینہ، برادرانہ تعلقات کو مزید مضبوط بنانے کیلئے ان کے عزم کو سراہا۔ فیلڈ مارشل سید عاصم منیر نے خادمِ حرمین شریفین اور سعودی قیادت کا اعزاز پر شکریہ ادا کیا اور کہا کہ یہ پاکستان اور سعودی عرب کے پائیدار رشتوں کی عکاسی ہے۔ انہوں نے مملکت کی سلامتی، استحکام اور خوشحالی کیلئے پاکستان کے غیر متزلزل عزم کا اعادہ کیا۔
