نیو یارک (پاکستان نیوز)آبنائے ہرمز میں متحدہ عرب امارات کے دو بحری جہازوں پر ایرانی کروز میزائلوں کے حملے میں ایک ہندوستانی ملاح ہلاک اور آٹھ دیگر زخمی ہو گئے ہیں جس کے بعد خطے میں کشیدگی انتہائی سنگین حد تک بڑھ گئی ہے۔متحدہ عرب امارات کی وزارت دفاع کے مطابق یہ بحری جہاز ممباسا اور البہیہ عمان کی سمندری حدود میں آبنائے ہرمز کے جنوبی راستے سے گزر رہے تھے جب انہیں نشانہ بنایا گیا۔ اس حملے کے نتیجے میں ممباسا نامی مال بردار بحری جہاز پر سوار ایک ہندوستانی شہری ہلاک ہو گیا جبکہ عملے کے 8 دیگر ارکان زخمی ہوئے جن میں سے 4 کی حالت تشویشناک بتائی جاتی ہے۔ زخمیوں میں 6 ہندوستانی اور 2 یوکرینی باشندے شامل ہیں۔ میزائل لگنے سے دونوں جہازوں میں شدید آگ بھڑک اٹھی جس سے املاک کو بڑا نقصان پہنچا تاہم بعد میں آگ پر قابو پا لیا گیا۔ متحدہ عرب امارات نے اس حملے کی شدید الفاظ میں مذمت کرتے ہوئے اسے بین الاقوامی قوانین کی کھلی خلاف ورزی قرار دیا ہے جو علاقائی سلامتی اور استحکام کے لیے ایک بڑا خطرہ ہے۔ حکام کا کہنا ہے کہ امارات اس جارحیت کا جواب دینے کا پورا حق رکھتا ہے اور اپنی سرزمین، شہریوں، مقیم افراد اور سٹریٹجک مفادات کے تحفظ کے لیے تمام ضروری اقدامات کرے گا۔ دوسری جانب خطے میں جاری اس کشیدگی کے دوران امریکی فوجی ٹھکانوں کو بھی نشانہ بنانے کی اطلاعات ہیں۔ اطلاعات کے مطابق ایران نے جوابی کارروائی کرتے ہوئے کویت میں امریکی فضائی دفاعی نظام، گولہ بارود کے ڈپو اور ایک فوجی ریڈار کو نشانہ بنایا۔ اس کے علاوہ بحرین میں امریکی مواصلاتی مرکز اور قطر میں امریکی فضائی اڈے پر بھی بیلسٹک میزائل داغے گئے جس سے خلیج کے خطے میں صورتحال مزید کشیدہ ہو گئی ہے۔
