نیویارک (پاکستان نیوز)مشی گن سے سینیٹ کے ڈیموکریٹک امیدوار عبدالسید نے فاکس نیوز کے معروف شو میں اپنے ریپبلکن حریف مائیک راجرز پر سخت تنقید کی جس پر میزبان جیسے واٹرز بھی مسکرانے پر مجبور ہو گئے۔ عبدالسید نے الزام عائد کیا کہ ڈونلڈ ٹرمپ کی حمایت یافتہ امیدوار مائیک راجرز ان سے مباحثے اور ٹی وی شو میں سامنے آنے سے گھبرا رہے ہیں اور وہ الیکشن میں حصہ لینے سے کتراتے ہوئے بزدلی کا مظاہرہ کر رہے ہیں۔ اس پر قدامت پسند میزبان جیسے واٹرز نے ہنستے ہوئے جواب دیا کہ اگرچہ وہ لفظی طور پر متفق نہیں ہیں لیکن یہ طنز واقعی مزاحیہ تھا۔ مبصرین کے مطابق عبدالسید کا یہ انداز انتہائی چست اور اثر انگیز تھا جس نے ایک کٹر قدامت پسند اینکر کو بھی محظوظ کر دیا۔ امریکی سینیٹ کے اس مقابلے میں عبدالسید نے راجرز کو 5 مختلف مباحثوں کا چیلنج دے رکھا ہے اور ان کا کہنا ہے کہ وہ ستمبر 15 اور اکتوبر 8 کے مجوزہ مباحثوں میں ہر صورت شرکت کریں گے چاہے ان کے حریف سامنے آئیں یا ان کے لیے خالی پوڈیم چھوڑنا پڑے۔ دوسری جانب مختلف تجزئیے بتاتے ہیں کہ ڈیموکریٹک امیدوار کی جانب سے حریف پر اس قسم کا براہ راست حملہ اور سخت الفاظ کا استعمال عوامی سطح پر ان کی مہم کو کافی تحرک فراہم کر رہا ہے جس سے آنے والے انتخابات میں مقابلہ مزید دلچسپ ہونے کی توقع ہے۔
