نیویارک (پاکستان نیوز)ٹیکساس کی ٹیرنٹ کاؤنٹی میں معمر اور ریٹائرڈ شہریوں سے سونا اور رقم ہتھیانے والے بین الاقوامی فراڈ نیٹ ورک کے خلاف پولیس کو بڑی کامیابی ملی ہے۔ اس خوفناک اور منظم اسکیم کے مرکزی کرداروں میں شامل 35 سالہ ملزم مزمل احمد کو نیویارک کے جان ایف کینیڈی بین الاقوامی ہوائی اڈے سے اس وقت گرفتار کر لیا گیا جب وہ ملک سے فرار ہو کر جدہ جانے والی پرواز میں سوار ہونے کی کوشش کر رہا تھا۔ حراست میں لیے جانے کے بعد ملزم کو قانونی مراحل کے تحت ٹیکساس منتقل کر کے ٹیرنٹ کاؤنٹی کی جیل میں منتقل کر دیا گیا ہے۔ تحقیقاتی حکام کے مطابق اس عالمی اور پیچیدہ فراڈ کے ذریعے 200 سے زائد معمر افراد سے 250 ملین ڈالر سے زائد کی رقم، نقد رقم اور سونا ہتھیا لیا گیا۔ فراڈ کا یہ طریقہ کار شہریوں کو ذہنی خوف اور دباؤ میں مبتلا کرنے پر مبنی تھا، جہاں خود کو سرکاری اہلکار یا بینک نمائندہ ظاہر کرنے والے افراد متاثرین کو فون کر کے یہ باور کراتے تھے کہ ان کے اثاثے یا شناخت خطرے میں ہیں۔ بعد ازاں شہریوں کو اپنی تمام تر بچتیں سونا یا کرپٹو کرنسی میں تبدیل کرنے پر مجبور کیا جاتا تھا اور جعلی اہلکار گھروں سے یہ اثاثے وصول کر لیتے تھے۔ عدالتی دستاویزات کے مطابق مزمل احمد اس نیٹ ورک میں مالیاتی نظام کو چھپانے اور غیر قانونی رقم کو قانونی شکل دینے کا اہم ذریعہ تھا۔ ملزم نے نیو جرسی میں کئی کاغذی کمپنیاں قائم کر رکھی تھیں، جن کے ذریعے حاصل شدہ سونا فلوریڈا کی ایک ریفائنری سے گزارا جاتا تھا اور بعد میں اسے کرپٹو کرنسی میں تبدیل کر کے بیرون ملک بھیج دیا جاتا تھا۔ ٹیرنٹ کاؤنٹی کی گرینڈ جیوری نے ملزم پر معمر افراد کا مالیاتی استحصال، غیر قانونی رقم کو سفید کرنا اور منظم جرائم میں شمولیت جیسے سنگین الزامات کے تحت فرد جرم عائد کر دی ہے۔ اس وسیع کیس میں اب تک 40 سے زائد دیگر مشتبہ افراد کے نام سامنے آ چکے ہیں اور کارروائیاں جاری ہیں۔
