کیلی فورنیا (پاکستان نیوز)فلوریڈا کی وفاقی گرینڈ جیوری نے پاکستان کے ضلع خانیوال سے تعلق رکھنے والے 33 سالہ شہری فہیم اکرام کیخلاف 126 ملین ڈالر کے پوسٹل فراڈ کے الزام میں باضابطہ فردِ جرم عائد کر دی ہے۔ امریکی حکام اور عدالتی دستاویزات کے مطابق، ملزم پر لئیبلز بینک نامی ویب سائٹ چلانے کا الزام ہے، جس کے ذریعے مبینہ طور پر جعلی اور غیر قانونی پوسٹل لیبل فروخت کیے جاتے تھے۔ اس کارروائی میں 5,200 سے زائد خریداروں نے 51 لاکھ سے زیادہ جعلی لیبلز حاصل کیے، جنہیں امریکہ کے ڈاک کے نظام میں استعمال کیا گیا۔
تحقیقاتی اداروں کا کہنا ہے کہ ویب سائٹ پر وزن، سائز اور منزل کی ترجیح کے بغیر محض 2 ڈالر فی لیبل کے طے شدہ نرخ پر جعلی بار کوڈز فراہم کیے جاتے تھے، جس سے امریکی پوسٹل سروس کو 126 ملین ڈالر کا بھاری مالی نقصان پہنچا۔ امریکی ڈاک معائنی سروس نے عدالتی حکم کے تحت ویب سائٹ اور ڈومین کو مکمل طور پر ضبط اور بند کر دیا ہے۔
ملزم کے خلاف امریکی حکومت کے ساتھ دھوکہ دہی، جعلی ڈاک ٹکٹ بنانے، اور الیکٹرانک فراڈ پر مشتمل کل 10 وفاقی الزامات درج کیے گئے ہیں۔ جرم ثابت ہونے کی صورت میں ہر الیکٹرانک فراڈ کے الزام پر 20 سال تک جبکہ دیگر الزامات پر 5 سال تک قید کی سزا سنائی جا سکتی ہے۔ فی الحال معاملہ عدالت میں زیرِ سماعت ہے اور الزامات کا حتمی ثبوت باقی ہے۔
