واشنگٹن (پاکستان نیوز)سینیٹ میں ایک نیا قانون سازی کا مسودہ پیش کیا گیا ہے جس کے تحت وزٹر ویزا پر امریکہ آنے والی حاملہ غیر ملکی خواتین کے بارے میں یہ قانونی فرض قائم کیا جائے گا کہ ان کا بنیادی مقصد اپنے بچے کی پیدائش کے ذریعے امریکی شہریت حاصل کرنا ہے۔ برتھ ٹورازم ایلیمینیشن ایکٹ کے نام سے یہ بل ساؤتھ کیرولائنا سے تعلق رکھنے والے ریپبلکن سینیٹر ٹم اسکاٹ نے متعارف کرایا ہے۔ اس بل کا مقصد وفاقی امیگریشن قوانین میں ترمیمی اقدامات کے ذریعے ان غیر ملکی شہریوں کو بی وزٹر ویزا پر اینٹری دینے سے روکنا ہے جن کی امریکہ آمد کی اصل وجہ صرف بچے کو جنم دینا ہے تاکہ ان کی اولاد کو امریکی شہریت مل سکے۔ برتھ ٹورازم اس عمل کو کہا جاتا ہے جس میں غیر ملکی حاملہ خواتین عارضی طور پر امریکہ کا سفر کرتی ہیں تاکہ پیدائش کے بعد ان کے بچے کو امریکی آئین کی فراہم کردہ سہولت مل سکے اور وہ شہریت کے ساتھ واپس اپنے وطن لوٹ سکیں۔ یہ نیا قانون سازی کا قدم ریپبلکن پارٹی کی اس مسلسل کوشش کا حصہ ہے جس کے تحت ملک میں برتھ ٹورازم پر پابندیاں لگانے اور پیدائشی شہریت کے دائرہ کار کو محدود کرنے کے لیے قانون سازی کی جا رہی ہے۔ ٠٣ جون کو سپریم کورٹ کی جانب سے صدر ڈونلڈ ٹرمپ کی اس سابقہ کوشش کو منسوخ کیے جانے کے بعد بھی ریپبلکنز اس معاملے پر سختی برتنے کے لیے پرعزم ہیں اور انہوں نے امیگریشن کنٹرول کو مزید سخت بنانے کا فیصلہ کیا ہے۔
