واشنگٹن (پاکستان نیوز)امریکی ایوان نمائندگان کے 175 ڈیموکریٹ اراکین نے ٹرمپ انتظامیہ کی جانب سے مسلمان کانگریس وومن الہان عمر کی امیگریشن ہسٹری کے بارے میں کی جانے والی وفاقی تحقیقات کی سخت مذمت کرتے ہوئے اسے ایک سیاسی انتقامی کارروائی قرار دیا ہے۔ قانون ساز پرمیلا جے پال کی قیادت میں سیکرٹری ہوم لینڈ سیکیورٹی مارک وین ملن اور اٹارنی جنرل ٹوڈ بلانچ کو لکھے گئے ایک خط میں خبردار کیا گیا ہے کہ الہان عمر کے واشنگٹن ڈی سی والے گھر پر حالیہ چھاپہ اور یہ تحقیقات آئندہ انتخابی نتائج کو متاثر کرنے کی ایک سوچی سمجھی کوشش ہے۔ ڈیموکریٹس نے مؤقف اختیار کیا کہ وسکونسن اور منیسوٹا کی عوام کے آزادانہ اور منصفانہ انتخاب کے آئینی حق کو پامال کیا جا رہا ہے کیونکہ انتخابات میں صرف ایک ہفتہ باقی ہے۔ خط میں وزارت انصاف اور دیگر وفاقی اداروں پر زور دیا گیا ہے کہ وہ اپنے اختیارات کا غلط استعمال بند کریں اور الہان عمر کے خلاف کی جانے والی تمام تلاشی اور دیگر کارروائیوں کو فوراً روکیں۔ دوسری طرف وفاقی تفتیش کاروں کا دعویٰ ہے کہ الہان عمر نے 1990 کی دہائی میں صومالیہ سے ہجرت کے وقت اپنی پیدائش کا سال غلط بتا کر امریکی شہریت حاصل کی تھی۔ یہ تحقیقات اس بات کے گرد گھومتی ہیں کہ آیا وہ اپنے والد کی شہریت کی درخواست کے وقت 17 سال کی تھیں یا 18 سال کی، کیونکہ عمر کا یہ فرق امریکی قوانین کے تحت ان کی شہریت کی قانونی حیثیت کو براہ راست متاثر کرتا ہے۔
