پاکستان میں سیاسی انارکی کا خاتمہ کیوں ممکن دکھائی نہیں دیتا، جمہوری نظام بار بار عدم استحکام کا شکار کیوں ہوتا ہے اور آخر کیا وجہ ہے کہ ملک سے ہزاروں میل دور بیٹھے پاکستانی بھی اپنے وطن کے سیاسی مستقبل کے حوالے سے امید کھوتے جا رہے ہیں۔
یہ محض سیاسی سوالات نہیں بلکہ ایک ایسے معاشرے کی اجتماعی بے چینی کا اظہار ہیں جس کے شہری اپنے ملک سے محبت تو کرتے ہیں، لیکن اس کے مستقبل کے بارے میں یقین کھوتے جا رہے ہیں۔
حال ہی میں ٹورنٹو میں سمندر پار پاکستانیوں کی ایک بیٹھک میں شرکت کا موقع ملا۔ بظاہر یہ ایک عام سی نشست تھی، لیکن گفتگو کا محور جب پاکستان کی سیاست، جمہوریت، معیشت اور ریاستی اداروں کے کردار کی طرف منتقل ہوا تو محسوس ہوا کہ جغرافیائی فاصلے دلوں میں موجود سیاسی اضطراب کو کم نہیں کر سکے۔ حیرت انگیز بات یہ تھی کہ مختلف سیاسی سوچ اور پس منظر رکھنے والے افراد کے تحفظات میں کئی مقامات پر غیر معمولی مماثلت تھی۔
اس صورت حال میں فوج کا سیاسی کردار بھی ایک بنیادی بحث ہے۔ پاکستان کی تاریخ میں فوجی حکومتوں کے ادوار اور جمہوری حکومتوں کے معاملات میں عسکری اداروں کے اثر و رسوخ نے سول ملٹری تعلقات کو ہمیشہ متنازع رکھا ہے۔ آج بھی معاشرے کا ایک بڑا طبقہ یہ سوال اٹھاتا ہے کہ جب ملک میں پارلیمنٹ، منتخب حکومت، عدلیہ اور دیگر آئینی ادارے موجود ہیں تو قومی فیصلوں میں ان اداروں کی خودمختاری اور اختیار کی حدود واضح کیوں نہیں ہوتی ہیں۔
یہ محض کسی ایک سیاسی جماعت یا شخصیت کا سوال نہیں۔ اصل مسئلہ ایک ایسے نظام کا ہے جس میں ہر ادارہ اپنے آئینی دائرہ اختیار میں رہ کر کام کرے، فوج کا بنیادی کردار ملکی دفاع اور قومی سلامتی کا تحفظ ہے، جبکہ حکومت اور ریاستی پالیسیوں کے فیصلے آئینی طور پر منتخب سیاسی قیادت اور پارلیمنٹ کے ذریعے ہونے چاہئیں۔ اس کے برعکس جب بھی سیاسی معاملات میں غیر منتخب قوتوں کے کردار پر سوالات اٹھتے ہیں تو جمہوری نظام کی ساکھ متاثر ہوتی ہے، فریڈم ہاؤس کی 2026 کی رپورٹ بھی پاکستان میں انتخابات، حکومتی تشکیل اور پالیسی سازی پر فوجی اثر و رسوخ کو جمہوری حقوق کے حوالے سے ایک اہم مسئلہ قرار دیتی ہے۔
تاہم اس تمام صورت حال کا ذمہ دار صرف ایک ادارے یا ایک فریق کو قرار دینا بھی درست تجزیہ نہیں ہوگا۔ سیاسی جماعتوں کی اپنی ذمہ داریاں بھی کم نہیں ہیں، بدقسمتی سے ہماری سیاسی قیادت نے بھی جمہوریت کو اکثر اقتدار کے حصول اور تحفظ تک محدود رکھا ہے۔ جب کوئی جماعت اقتدار سے باہر ہوتی ہے تو اسے جمہوری اصول یاد آتے ہیں، لیکن اقتدار میں آنے کے بعد وہی جماعتیں مخالفین کے لیے سیاسی گنجائش پیدا کرنے میں ناکام رہتی ہیں، جماعتوں کے اندر جمہوریت، شفاف احتساب، مضبوط مقامی حکومتوں اور ادارہ جاتی اصلاحات کا فقدان اس بحران کو مزید گہرا کرتا ہے، برٹلینڈ ٹرانسفارمیشن انڈیکس کی 2026 کی پاکستان رپورٹ بھی سیاسی جماعتوں کی کمزور داخلی جمہوریت اور سیاسی دھڑے بندی کو نظام کے مسائل میں شمار کرتی ہے۔
اس کی ایک وجہ یہ بھی ہے کہ بیرون ملک رہنے والے پاکستانی روزانہ ایسے معاشروں میں زندگی گزارتے ہیں جہاں اداروں کی کارکردگی، قانون کی حکمرانی، شہری آزادیوں اور حکومتی جواب دہی کو معمول کا حصہ سمجھا جاتا ہے۔ وہ دیکھتے ہیں کہ حکومتیں تبدیل ہوتی ہیں، وزرائے اعظم آتے اور جاتے ہیں، لیکن ریاستی اداروں اور بنیادی قومی پالیسیوں کا تسلسل برقرار رہتا ہے، انہیں یہ احساس ہوتا ہے کہ ریاست کسی ایک حکمران، جماعت یا شخصیت کا نام نہیں بلکہ ایک مستقل نظام کا نام ہے۔
اس کے برعکس پاکستان میں سیاسی تبدیلی اکثر ایک نئے سیاسی تصادم، نئے انتقام اور نئی محاذ آرائی کا پیش خیمہ بن جاتی ہے، یہی وہ تضاد ہے جو بیرون ملک بیٹھے پاکستانیوں کو زیادہ شدت سے محسوس ہوتا ہے۔
ان کی مایوسی صرف سیاست تک محدود نہیں، انہیں پاکستان میں اپنے خاندانوں کے مستقبل، بچوں کی تعلیم، روزگار، انصاف، معاشی تحفظ اور امن و امان کی بھی فکر ہے، وہ وطن میں سرمایہ کاری کرنا چاہتے ہیں، کاروبار کرنا چاہتے ہیں، اپنے تجربات اور صلاحیتوں سے ملک کی خدمت کرنا چاہتے ہیں، لیکن جب انہیں پالیسیوں کے عدم تسلسل اور غیر یقینی صورت حال کا سامنا ہوتا ہے تو ان کے اعتماد کو دھچکا پہنچتا ہے۔
پاکستان کو اس سیاسی دلدل سے نکالنے کے لیے کسی ایک شخصیت، جماعت یا ادارے کی بالادستی نہیں بلکہ آئین کی بالادستی، پارلیمنٹ کی خودمختاری، عدلیہ کی آزادی، آزاد صحافت، شفاف انتخابات اور سیاسی برداشت ناگزیر ہے، فوج اور سیاسی قیادت سمیت تمام اداروں کو اپنے اپنے آئینی کردار کا احترام کرنا ہوگا۔
آخر میں سوال یہ نہیں کہ پاکستان کا مستقبل کون سنوارے گا، بلکہ سوال یہ ہے کہ کیا ہم ایک ایسا نظام بنانے پر آمادہ ہیں جس میں کسی فرد یا ادارے کے بجائے آئین اور قانون کو بالادستی حاصل ہو، کیونکہ قومیں صرف حکمران بدلنے سے نہیں بدلتیں، قوموں کی تقدیر اس وقت بدلتی ہے جب ان کے نظام کی بنیادیں مضبوط ہوتی ہیں اور شاید یہی وہ بنیادی تبدیلی ہے جس کا انتظار آج پاکستان میں رہنے والے بھی کر رہے ہیں اور ٹورنٹو جیسے شہروں میں بیٹھے سمندر پار پاکستانی بھی بے چین ہیں۔










