موجودہ حالات کے تناظر میں جب ہم اپنے مادرِ علمی اور آبائی وطن پاکستان کے معاملات کا گہرائی سے جائزہ لیتے ہیں، تو دل خون کے آنسو روتا ہے۔ جہاں ایک طرف عالمی سطح پر بڑی طاقتوں کے ساتھ تعلقات اور دفاعی معاہدوں کی باتیں کی جاتی ہیں، وہیں دوسری طرف عام انسان کی زندگی بنیادی مسائل کی دلدل میں دھنستی چلی جا رہی ہے۔ جب ہم دیار غیر میں بہترین زندگی گزار رہے ہیں وہیں پاکستان میں اپنے ان بہن بھائیوں اور خاندانوں کی فکر کرتے ہیں جو تاحال پاکستان میں کسمپرسی کی زندگی گزار رہے ہیں، تو یہ احساس مزید گہرا ہو جاتا ہے کہ ہمارے پالیسی سازوں کی ترجیحات میں عام انسان کہیں دور دور تک موجود نہیں ہے۔ پاکستانی امریکی اور مسلم امریکی کمیونٹیز جو یہاں امریکہ میں محنت مزدوری کر کے اپنی زندگیاں سنوار رہی ہیں، جب وہ اپنے وطن کی اس زبوں حالی کو دیکھتی ہیں، تو ان کے دلوں میں ایک عجیب سی بے چینی اور اضطراب پیدا ہوتا ہے، کیونکہ ہم سب جانتے ہیں کہ وطن کی مٹی سے ہمارا رشتہ کسی بھی صورت کمزور نہیں ہو سکتا اور وہاں کے بگڑتے ہوئے حالات براہ راست ہمارے جذبات اور رشتوں کو متاثر کرتے ہیں۔ آج ضرورت اس امر کی ہے کہ ہم ان تلخ حقائق کا سامنا کریں جو ہمارے ملک کی بنیادوں کو اندر سے کھوکھلا کر رہے ہیں۔
ملک کی معیشت کا حال یہ ہو چکا ہے کہ قومی آمدنی کا سب سے بڑا حصہ صرف اور صرف بیرونی قرضوں کی سود کی ادائیگی کی نذر ہو جاتا ہے۔ حالیہ اعداد و شمار کے مطابق ہمارے ملک کا بیرونی سرکاری قرضہ آسمان کو چھو رہا ہے اور اس کی ادائیگی کے لیے اربوں ڈالر خرچ کیے جا رہے ہیں، لیکن المیہ یہ ہے کہ اتنی بھاری رقوم چکانے کے باوجود ہمارا کل قرض کم ہونے کے بجائے مزید بڑھتا چلا جا رہا ہے۔ حکومت کی طرف سے جو وفاقی بجٹ پیش کیا جاتا ہے اس میں قرضوں کے سود کے لیے جو خطیر رقم رکھی جاتی ہے وہ دفاعی بجٹ سے بھی کئی گنا زیادہ ہوتی ہے اور کل بجٹ کا تقریبا آدھا حصہ بن جاتی ہے۔ اس صورتحال کا نتیجہ یہ نکلتا ہے کہ ملک کے اندر تعلیم، صحت، صاف پانی اور روزگار جیسے بنیادی شعبوں کے لیے خزانے میں کچھ بھی نہیں بچتا۔ حکومتیں دعوے تو بہت بڑے بڑے کرتی ہیں، لیکن زمینی حقائق اس کے بالکل برعکس نظر آتے ہیں، جہاں عام آدمی مہنگائی کے بوجھ تلے اس طرح پس رہا ہے کہ اس کے لیے دو وقت کی روٹی کا حصول بھی ایک بہت بڑا چیلنج بن چکا ہے۔
دوسری طرف تعلیم اور صحت جیسے انسانی ترقی کے دو انتہائی اہم ستون حکومتی عدم توجہی کا شکار ہو کر رہ گئے ہیں۔ اعداد و شمار گواہ ہیں کہ حکومت کی جانب سے تعلیم اور صحت پر مجموعی قومی پیداوار کا نہایت ہی کم حصہ خرچ کیا جاتا ہے، جس کی وجہ سے غریب اور متوسط طبقے کے بچوں کے لیے معیاری تعلیم کا حصول ایک خواب بن گیا ہے۔ آج صورتحال یہ ہے کہ اسکولوں کی فیسوں اور مہنگی کتابوں کا بوجھ حکومت اٹھانے کے بجائے مجبور والدین اپنی جیبوں سے اٹھا رہے ہیں۔ غریب کسان اور مزدور کا بچہ اچھی تعلیم اور اچھے اسکول کے تصور سے بھی محروم ہے، کیونکہ پرائیویٹ اداروں کے دروازے صرف ان لوگوں کے لیے کھلے ہیں جن کی جیبیں بھاری ہوں۔ یہی حال صحت کے شعبے کا ہے، جہاں علاج معالجے کے اخراجات اس حد تک بڑھ چکے ہیں کہ غریب آدمی معمولی بیماری کی صورت میں بھی اپنی جمع پونجی سے محروم ہو جاتا ہے اور کئی بار تو پورا خاندان اس مالی بوجھ کی وجہ سے مکمل طور پر تباہ ہو جاتا ہے۔ یہ ناانصافیاں صرف مالی نقصان تک محدود نہیں رہتیں بلکہ اس کے اثرات براہ راست ہماری آنے والی نسلوں کے مستقبل پر پڑتے ہیں، جب کسی معاشرے میں تعلیم اور صحت جیسی بنیادی سہولتیں تجارتی بن جائیں تو وہاں سے انسانی صلاحیتیں دم توڑنے لگتی ہیں۔
ہمارے دل اپنے ان عزیزوں کے ساتھ دھڑکتے ہیں جو پاکستان کے اسپتالوں میں علاج کے لیے اور اسکولوں میں فیسوں کے لیے پریشان رہتے ہیں۔ ہم یہاں بیٹھ کر صرف دعائیں ہی نہیں کر سکتے، بلکہ یہ ہمارا اخلاقی فرض بنتا ہے کہ ہم ان آوازوں کو بلند کریں جو وہاں پسے ہوئے طبقے کی نمائندگی کرتی ہیں۔ نیشنل سکیورٹی کا اصل مطلب صرف سرحدوں کی حفاظت یا بڑے بڑے عسکری معاہدے نہیں ہوتے، بلکہ اصل تحفظ تو یہ ہے کہ ملک کا ہر شہری بھوک سے محفوظ ہو، اسے دو وقت کی روٹی ملے، اس کے بچوں کو اچھی تعلیم اور بیمار کو بہتر علاج میسر ہو۔ جب تک حکمران اس بنیادی فلسفے کو نہیں سمجھیں گے اور ملک کو اشرافیہ کے تسلط سے آزاد نہیں کرائیں گے، اس وقت تک حالات میں بہتری کی کوئی امید نہیں کی جا سکتی۔ ہمیں بحیثیت قوم اور ایک باشعور کمیونٹی کے یہ سوچنا ہوگا کہ کب تک ہمارا وطن قرضوں کی زنجیروں میں جکڑا رہے گا اور کب ہمارے لوگ بنیادی انسانی حقوق کے لیے یوں ہی دربدر رہیں گے۔










