معاشرتی دیوالیہ پن، اور معصوم کلیوں کا قتل عام!!!

0
15
جاوید رانا

گذشتہ ہفتے کے کالم میں ہم نے پاکستان میں سسکتے انسانی حقوق اور بے حسی کی چادر کے عنوان سے وطن عزیز کے سیاسی ، حکومتی اور معاشی نظام کی دگرگوں حالت کا احاطہ کرنے کی کوشش کی تھی۔ اس تحریر میں مقتدر حلقوں کی سیاسی مداخلت کی تاریخ، سیاسی و مذہبی جماعتوں اور مختلف دباؤ ڈالنے والے گروہوں کے آپس کے تناؤ اور گٹھ جوڑ پر تفصیلی روشنی ڈالی گئی تھی۔ اس کاوش کو نہ صرف امریکہ بلکہ پاکستان میں موجود قارئین نے بھی بے حد سراہا۔ سماجی رابطے کی ویب سائٹس، پیغام رسانی کے حلقوں اور کئی دوست احباب نے ذاتی طور پر رابطہ کر کے اس جرأت مندانہ تحریر کی حوصلہ افزائی کی۔ ہم شکاگو اور پورے امریکہ میں مقیم ان تمام قارئین اور احباب کا تہہ دل سے شکریہ ادا کرتے ہیں جنہوں نے ہماری اس ادنیٰ سی کوشش کو اتنی پذیرائی بخشی۔
پاکستان بے شک معاشی، سیاسی اور تعلیمی میدان میں دنیا سے بہت پیچھے رہ گیا ہے لیکن اس کا سب سے بڑا اور اصل نقصان اس کا معاشرتی دیوالیہ پن ہے۔ ہم چاہے جتنا بھی سیاسی جماعتوں، مذہبی رہنماؤں، فرقہ واریت اور غیر جمہوری مداخلت کو مورد الزام ٹھہراتے رہیں لیکن یقین جانیے ہم معاشرتی طور پر بحیثیت ایک زندہ قوم تو دور کی بات ایک انسانی المیے سے کم نہیں ہیں۔ ہماری معاشرتی رواداریاں، ہمدردی اور اخلاقی اقدار نجانے کب کی منوں مٹی تلے دفن ہو چکی ہیں۔ آپ بھی سوچ رہے ہوں گے کہ میں بات کو کس طرف لے کر جا رہا ہوں مگر تلخ حقیقت یہی ہے کہ ہم اندر سے کھوکھلے اور معاشرتی طور پر مکمل دیوالیہ ہو چکے ہیں۔
ہمارے معاشرے کا المیہ یہ ہے کہ یہاں ہر شخص، چاہے وہ کسی بھی عہدے یا حیثیت میں کام کر رہا ہو، چاہے وہ کسی سکیورٹی ادارے کا اہلکار ہو، پولیس افسر یا سپاہی ہو، یا کسی سرکاری محکمے میں معمولی کلرک ہی کیوں نہ ہو، وہ اپنے ذاتی مفادات اور طاقت کے نشے میں قانون کی دھجیاں اڑانا اپنا اولین حق سمجھتا ہے۔ طاقت کے اس گھمنڈ میں انسانیت کی تمام حدیں پار کر دی جاتی ہیں۔ گزشتہ دنوں برطانوی نشریاتی ادارے کی ایک خبر نظر سے گزری تو دل دہل گیا اور خون کھول اٹھا کہ اسلام آباد جیسے دارالحکومت اور پوش علاقوں میں بھی انسان اتنے ظالم اور درندہ صفت ہو سکتے ہیں، یہ کبھی سوچا بھی نہیں جا سکتا تھا۔
یہ دلخراش واقعہ کچھ اس طرح پیش آیا کہ اسلام آباد میں ٹریفک پولیس میں تعینات ایک افسر کے گھر پر 13سالہ معصوم گھریلو ملازمہ فاطمہ وحشیانہ تشدد کی نذر ہو کر اپنی جان سے ہاتھ دھو بیٹھی۔ اس کمسن بچی کو جب ہسپتال پہنچایا گیا تو وہ دم توڑ چکی تھی اور طبی معائنے کی رپورٹ کے مطابق اس کے نازک جسم پر بیسیوں تشدد کے واضح نشانات موجود تھے جو اس کی موت کا سبب بنے۔ یہ کوئی پہلا واقعہ نہیں ہے بلکہ ہمارے معاشرے میں ایسی ہزاروں نہیں لاکھوں معصوم بچیاں شدید غربت اور افلاس کے ہاتھوں مجبور ہو کر امیر لوگوں کے گھروں میں دن رات مشقت کرنے پر مجبور ہیں۔ پاکستان میں ایسے افسوسناک واقعات آئے روز منظر عام پر آتے رہتے ہیں، چاہے وہ اسلام آباد، لاہور اور کراچی جیسے بڑے شہر ہوں یا دور دراز کے چھوٹے قصبے اور دیہات، جہاں قانون کے رکھوالے بھی بااثر افراد کے سامنے بے بس نظر آتے ہیں۔
اگر ہم ماضی کے اوراق پلٹیں تو دل خون کے آنسو روتا ہے۔ 2020 میں راولپنڈی میں 7سالہ کمسن ملازمہ زہرہ شاہ کو محض اس جرم میں تشدد کر کے قتل کر دیا گیا کہ اس سے پنجرے میں بند طوطے اڑ گئے تھے۔ اسی طرح 2019 میں لاہور میں 16سالہ عظمیٰ بی بی کو بدترین تشدد کے بعد قتل کر کے نہر میں پھینک دیا گیا۔ صرف گھریلو ملازمائیں ہی نہیں بلکہ معصوم بچیوں کے ساتھ جنسی زیادتی اور قتل کے لرزہ خیز واقعات بھی ہماری تاریخ پر بدنما داغ ہیں۔ 2018 میں قصور کی ننھی زینب کے ساتھ ہونیوالی درندگی اور قتل نے پوری دنیا کو ہلا کر رکھ دیا تھا، جس کے بعد قانون سازی کے بڑے بڑے دعوے کیے گئے مگر زمینی حقائق آج بھی جوں کے توں ہیں۔ 2015 میں بھی قصور ہی میں بچوں کے استحصال کا ایک ہولناک اسکینڈل سامنے آیا تھا، لیکن افسوس کہ اتنے بڑے سانحات بھی ہمارے ضمیر کو جھنجھوڑنے میں ناکام رہے۔
ہم یہاں امریکہ میں اپنے بچوں کو اسلامی تعلیمات، انسانی حقوق اور اخلاقیات کا درس دیتے نہیںتھکتے، لیکن جب ہمارے اپنے ملک اور مسلمان معاشرے میں معصوم بچیوں پر ظلم کے پہاڑ توڑے جاتے ہیں تو ہم اپنے بچوں اور مقامی لوگوں کے سامنے شرمندگی محسوس کرتے ہیں۔ اسلام تو وہ دین ہے جس نے بیٹیوں کو زندہ درگور کرنے کی رسم ختم کر کے انہیں رحمت قرار دیا اور غلاموں اور ملازمین کے ساتھ حسن سلوک کا حکم دیا، مگر آج ہم نے اپنے طرز عمل سے دین کی روح کو ہی مجروح کر دیا ہے۔
یہ لمحہ فکریہ ہے کہ آخر ہمارا معاشرہ کس تباہی کی طرف جا رہا ہے۔ ہم کس حد تک ظالم، بے حس اور فرعون بنتے جا رہے ہیں۔ اگر معصوم بچیوں کے ساتھ ہونیوالی یہ درندگی، جنسی زیادتی اور بہیمانہ قتل کے واقعات بھی ہمیں درست سمت پر نہیں لا سکے تو پھر ہمیں کون سی چیز ہدایت نصیب کر سکتی ہے۔ غربت کی چکی میں پسنے والے والدین مجبوری میں اپنے جگر کے ٹکڑوں کو دوسروں کے رحم و کرم پر چھوڑ دیتے ہیں، مگر اس کا ہرگز یہ مطلب نہیں کہ ان کی زندگیوں سے کھیلنے کا اختیار کسی کو مل گیا ہے۔
ضرورت اس امر کی ہے کہ پاکستان کے ارباب اختیار، عدلیہ اور قانون نافذ کرنے والے ادارے محض کاغذی کارروائیوں اور زبانی جمع خرچ کے بجائے ان قوانین پر سختی سے عمل درآمد یقینی بنائیں۔ کم عمر بچوں سے گھریلو مشقت لینے پر مکمل پابندی عائد کی جائے اور طاقتور مجرموں کو عبرتناک سزائیں دی جائیں تاکہ آئندہ کسی کو کسی غریب کی بیٹی پر ہاتھ اٹھانے کی جرأت نہ ہو۔ اس کے ساتھ ساتھ سمندر پار مقیم پاکستانیوں اور سماجی تنظیموں کو بھی چاہیے کہ وہ وطن عزیز میں غریب بچوں کی تعلیم اور کفالت کے منصوبوں میں بڑھ چڑھ کر حصہ لیں، کیونکہ جب تک ہم بحیثیت معاشرہ اپنی ذمہ داری قبول نہیں کریں گے، تب تک معصوم کلیاں اسی طرح مسلی جاتی رہیں گی۔

 

 

 

LEAVE A REPLY

Please enter your comment!
Please enter your name here