اسلام آباد(پاکستان نیوز) آئی ایم ایف نے کہا ہے کہ پاکستان سے سٹاف لیول معاہدے میں نمایاں پیشرفت ہوئی ہے، موسمیاتی تبدیلیوں سے متعلق فنڈز بھی فراہم کئے جا سکتے ہیں، پاکستان نے قرض پروگرام کی شرائط پر سختی سے عملدرآمد کیا، حکومتی قرضے کم کرنے کیلئے سخت معاشی اقدامات کئے، مہنگائی کم کرنے کیلئے سخت مانیٹری پالیسی اپنائی گئی، بجلی کی پیداواری لاگت کم کرنے کیلئے اصلاحات کی گئیں جب کہ معاشی شرح نمو بڑھانے کیلئے اصلاحاتی ایجنڈے پر عملدرآمد کیا گیا ہے۔ آئی ایم ایف نے پاکستان کیساتھ پہلے اقتصادی جائزے کے بارے میں مذاکرات سے متعلق اعلامیہ جاری کر دیا ہے۔ اعلامیہ میں کہا گیا ہے کہ پاکستان کے ساتھ سات ارب ڈالر قرض پروگرام پر جائزے اور کلائمیٹ فنانسنگ کیلئے بھی بات چیت ہوئی۔ پاکستان نے موجودہ قرض پروگرام پر سختی سے عمل درآمد کیا۔ توانائی کے شعبے میں لاگت کم کرنے، معاشی ترقی کی شرح بڑھانے، صحت عامہ، تعلیم کے فروغ، سماجی تحفظ، قرضوں کی ادائیگی کی مینجمنٹ، موسمیاتی تبدیلیوں کے اثرات کم کرنے پر بھی تبادلہ خیال ہوا۔ پاکستان کیساتھ بات چیت مثبت رہی، دونوں فریق مذاکرات کو حتمی شکل دینے کیلئے ورچوئلی بات چیت جاری رکھیں گے۔ آئی ایم ایف کے مطابق کلائمیٹ ریفارمز ایجنڈے پر بھی مذاکرات ہوئے اور پاکستان کو موسمیاتی تبدیلیوں سے نمٹنے کیلئے ممکنہ طور پر فنڈز فراہم کیے جاسکتے ہیں۔ ادھر پاکستانی حکام نے امید ظاہرکی ہے کہ تین شعبوں میں تحفظات کے باوجود آئی ایم ایف مشن قسط کے اجرا کی سفارش کریگا۔ علاوہ ازیں وفاقی وزیرخزانہ محمد اورنگزیب نے آئی ایم ایف کے ساتھ مذاکرات پر اطمینان کا اظہار کرتے ہوئے کہا آئی ایم ایف کے ساتھ نتیجہ خیزمشاورت آئندہ ہفتے جاری رہے گی۔ آئی ایم ایف پروگرام پر عملدرآمد مضبوط رہا ہے، ہم نے مذاکرات میں بہت اچھی پیشرفت کی۔ آئی ایم ایف مشن کو معاشی کارکردگی سے آگاہ کیا۔
