اسلام آباد(پاکستان نیوز) پاکستان انٹر نیشنل ایئر لائن (پی آئی اے ) کے امریکہ میں روز ویلٹ ہوٹل کی نجکاری ایک بار پھر التوا کا شکار ہوگئی ۔ نجی ٹی وی کے مطابق اس حوالے سے پی آئی اے ذرائع نے بتایا کہ نجکاری کمیشن نے نجکاری سے متعلق نئے مالیاتی مشیر کی تقرری کیلئے کمپنیوں سے نئی درخواستیں طلب کرلی ہیں۔ درخواست کے ساتھ ایک ہزار امریکی ڈالر جمع کرانا لازمی ہونگے ۔ ذرائع کے مطابق مالیاتی مشیر کی سروس کیلئے درخواستیں نجکاری کمیشن اسلام آباد کو 2 ستمبر تک ارسال کرنا ہوں گی۔ یادر ہے کہ گزشتہ ماہ جولائی میں قومی ایئر لائن کے امریکی روز ویلٹ ہوٹل سے ایک ارب ڈالر کی تاریخ ساز آمدن متوقع تھی، متعلقہ حکام کو امید تھی کہ نجکاری کی کوششیں بار آور ثابت ہونگی۔ حکومت کی جانب سے روز ویلٹ ہوٹل کی نجکاری کے سلسلے میں کوششیں کامیاب ہونے کا امکان ظاہر کیا جا رہا تھا ، اس حوالے سے ذرائع نجکاری کا کہنا تھا کہ روز ویلٹ ہوٹل کی نجکاری کے سلسلے میں اس وقت 3 آپشنز پر غور کیا جارہا تھا۔
