نیو یارک (پاکستان نیوز)کوئینز میں ڈسٹرکٹ الیون سے تعلق رکھنے والے معروف سیاسی سماجی کارکن آدم اعظم نے ڈیموکریٹک پرائمری بیلٹ سے باہر ہونے کے بعد باضابطہ طور پر آزاد امیدوار کی حیثیت سے انتخابی میدان میں اترنے کا اعلان کر دیا ہے۔ سماجی رابطوں کی ویب سائٹ پر جاری کردہ اپنے ایک تفصیلی بیان میں انہوں نے واضح کیا کہ اگرچہ ان کا نام ڈیموکریٹک پارٹی کے بیلٹ پیپر پر موجود نہیں ہے، لیکن ان کی جدوجہد ختم نہیں ہوئی بلکہ ایک نئے عزم کے ساتھ شروع ہو رہی ہے۔ انہوں نے اس فیصلے کو سیاسی جوڑ توڑ اور پس پردہ معاہدوں کے خلاف ایک کھلی جنگ قرار دیا ہے۔ آدم اعظم کا کہنا ہے کہ ان کی مہم کبھی بھی پارٹی کے اندرونی عہدیداروں یا سیاسی چالوں کے لیے نہیں تھی، بلکہ ان کا مقصد کوئینز کے محنتی خاندانوں، تارکین وطن، چھوٹے کاروباری حضرات، بزرگوں اور نوجوانوں کی حقیقی نمائندگی کرنا ہے۔ انہوں نے موجودہ سینیٹر ٹوبی اسٹاویسکی کے خلاف آزادانہ حیثیت میں انتخاب لڑنے کا عزم ظاہر کرتے ہوئے کہا کہ وہ البانی میں اپنے علاقے کی آواز بن کر ابھریں گے۔ اپنے پیغام میں انہوں نے حلقے کے عوام کو مخاطب کرتے ہوئے کہا کہ جب دوسرے لوگ پارٹی کی مشینری پر تکیہ کر رہے ہیں، وہ کوئینز کے عوام کی طاقت پر بھروسہ کرتے ہیں۔ وہ سچائی، انصاف، تحفظ اور سستی رہائش کے ساتھ ساتھ بہتر تعلیمی نظام کے لیے لڑتے رہیں گے۔ انہوں نے اس عزم کا اظہار کیا کہ یہ دوڑ ابھی ختم نہیں ہوئی بلکہ یہ ایک نئی شروعات ہے تاکہ ڈسٹرکٹ الیون کو سیاست کے بجائے عوامی خدمت کا حقیقی علمبردار مل سکے۔ آدم اعظم نے اپنے حامیوں سے اپیل کی کہ وہ اس آزاد تحریک کا حصہ بنیں اور تاریخ رقم کرنے میں ان کا ساتھ دیں۔
