نیویارک (پاکستان نیوز)واشنگٹن پوسٹ اور اے بی سی نیوز کی جانب سے جاری کردہ نئے سروے کے نتائج نے امریکی صدر کے لیے ایک مشکل صورتحال پیدا کر دی ہے۔ اس جائزے میں شامل 59 فیصد شہریوں کا ماننا ہے کہ ٹرمپ ملک کی باگ ڈور سنبھالنے کے لیے ضروری ذہنی مستعدی نہیں رکھتے جبکہ 55 فیصد افراد نے ان کی جسمانی صحت کو صدارتی ذمہ داریوں کے حوالے سے ناکافی قرار دیا ہے۔ رائے دہندگان کی ایک بڑی تعداد یعنی 67 فیصد کا یہ بھی خیال ہے کہ صدر اہم فیصلے سوچ سمجھ کر نہیں کرتے اور 54 فیصد کے نزدیک وہ ایک مضبوط لیڈر ثابت نہیں ہوئے ہیں۔
صدر کی مقبولیت میں اس ریکارڈ کمی کی ایک بڑی وجہ ایران کے ساتھ حالیہ جنگ اور اس کے نتیجے میں پیدا ہونے والی مہنگائی بتائی جا رہی ہے۔ خاص طور پر آبنائے ہرمز کی بندش نے عالمی سطح پر تیل کی ترسیل کو شدید متاثر کیا ہے جس سے امریکہ میں ایندھن کی قیمتیں آسمان سے باتیں کر رہی ہیں۔ سروے میں آدھے سے زیادہ شہریوں نے خدشہ ظاہر کیا ہے کہ آنے والے سال میں گیس کی قیمتیں مزید بڑھ سکتی ہیں۔ اگرچہ حکومتی عہدیداروں کا دعویٰ ہے کہ تجارتی راستے کھلنے سے عوام کو فوری ریلیف ملے گا اور صدر نے بھی وسط مدتی انتخابات سے قبل قیمتوں میں بڑی کمی کی نوید سنائی ہے، مگر عوام میں بے چینی برقرار ہے۔
مزید برآں 61 فیصد امریکیوں کا خیال ہے کہ ایران کے ساتھ تنازع نے ملک کے لیے دہشت گردی کے خطرات میں اضافہ کر دیا ہے۔ یہ سروے اپریل کے اختتام پر 2560 افراد کی رائے پر مبنی ہے جس میں غلطی کی گنجائش 2.2 فیصد بتائی گئی ہے۔ سروے کے نتائج سے واضح ہوتا ہے کہ جنگ بندی کے باوجود امریکی عوام اب بھی مستقبل کے حوالے سے عدم تحفظ کا شکار ہیں۔
